I-PSL seyigcine iyivezile imali ezotholwa ompetha beBetway Premiership
SIHLE NGUBO
Ompetha beBetway Premiership bazohleka bodwa ekupheleni kwesizini ka-2024/2025 njengoba sekunabaxhasi abasha.
Lokhu kuvezwe usihlalo wePremier Soccer League (PSL), u-Irvin Khoza, ngesikhathi kunesithangami nabezindaba emahhovisi ePSL ngoLwesithathu emini.
Abalandeli bebhola baseNingizimu Afrika bebedunguza ebumnyameni ngokuthi yimalini ezotholwa ompetha beligi, yize bese kunesikhathi eside (imidlalo eyisikhombisa) kuqale imidlalo yeBetway Premiership.
“Ompetha beBetway Premiership bazothola u-R20 million ekupheleni kwesizini,” kusho uKhoza.
Ngaphansi kwabaxhasi abadala, iMultichoice, ompetha beligi bebethola u-R15 million. Iqembu eligcine liwine leyo mali yiMamelodi Sundowns.
Njengamanje i-Orlando Pirates iyona ezihola phambili ngamaphuzu angu-21 ngemuva kwemidlalo eyisikhombisa. IBucs isethubeni elihle lokuhamba naso isicoco seligi njengoba isayizwa ngendaba induku selokhu kuqale isizini.
NgoLwesibili iPirates ishaye iRichards Bay FC ngo 1-0 emdlalweni weBetway Premiership, e-Orlando Stadium. Ngokwenza lokhu iziqophele irekhodi layo elisha lokunqoba imidlalo yokuqala eyisikhombisa yeligi.
IBucs seyivele inqobe iMTN8 ehambisana no-R10 million. Ukunqoba iPremiership kungasho ukuthi izoqeda isizini ibomvu yimali.
