IBucs kumele inqume ngokudlalisa abanamakhadi koweligi

SIHLE NGUBO 

I-Orlando Pirates kumele ithathe isinqumo sokuthi iyabadlalisa yini abadlali bayo abanamakhadi aphuzi amathathu ngaphambi komdlalo womkhaya neKaizer Chiefs ngempelasonto.

IBucs izobhekana neSekhukhune United emdlalweni weBetway Premiership, e-Orlando Stadium, ngoLwesithathu ngo-7.30 ebusuku.

EZimnyama zizoya kulo mdlalo zinabadlali abahlanu abanamakhadi aphuzi amathathu. 

Labo badlali uPatrick Maswanganyi, uRelebohile Mofokeng, uTapelo Xoki, uThabiso Sesane noThalente Mbatha.

Ngemuva komdlalo wangoLwesithathu iBucs izobe seyilungiselela ukubhekana naMakhosi emdlalweni weBetway Premiership eFNB Stadium, ngoMgqibelo, ngo-3 ntambama.

Lezi zinkunzi zaseSoweto zizophinde zittholane phezulu emdlalweni wamanqamu weNedbank Cup, eMoses Mabhida Stadium, eThekwini, ngoMeyi 10.

Yonke imidlalo ezodlalwa yiPirates manje ibaluleke kakhulu njengoba izama ukusukela iMamelodi Sundowns ekunqobeni isicoco seligi nokuvikela iNedbank Cup.

Kuzoncika kuyona iPirates ukuthi iyawathatha yini amashansi ngokudlalisa laba badlali abanamakhadi aphuzi.

Uma bethola amakhadi aphuzi bebhekene neBabina Noko, kuzosho ukuthi ngeke bawudlale umdlalo womkhaya lapho bezobhekana khona neChiefs.

Amakhosi azoya kulo mdlalo eshayela phansi kulandela ukushaywa yiMarumo Gallants ngo 2-1 ngempelasonto.

IBucs nayo akuyihambelanga kahle kwiCAF Champions League njengoba iwashiswe ijezi yiPyramids SC eyishaye ngo 3-2 kowandulela owamanqamu.