IDowns seyibheke ukuyobhekana nogesi weMagesi kowamanqamu
SIHLE NGUBO
IMamelodi Sundowns izobhekana neMagesi FC emdlalweni wamanqamu weCarling Knockout, eFree State Stadium, ngoNovemba 23.
Abafana Ba’Style bazibekisele indawo kowamanqamu kulandela ukushaya iMarumo Gallants ngo 2-0 emdlalweni owandulela owamanqamu eDr Petrus Molemela, ngeSonto ntambama.
Lo mdlalo ubuphethwe yiGallants ngesiwombe sokuqala futhi iyona ekhahlelele ipali kaningi kunezivakashi. Ziye ekhefini kungu 0-0.
Nangesiwombe sesibili iGallants ibikhombisa ukuba yingozi uma iya phambili. Nokho iSundowns ithole iphenathi ngomzuzu ka-53, wayibeka phakathi uLucas Ribeiro Costa.
Lo mdlali waseBrazil uqokwe njengomdlali ovelele kulo mdlalo wazitholela u-R100 000.
Izamile ukubuya iGallants kodwa wangafuna ukudedela igoli uRonwen Williams ezintini zeSundowns.
Kuthe sekubukeka sengathi umdlalo uzophela ngo 1-0 waqhamuka uNeo Maema washaya igoli lokushayela isipikili sokugcina ngomzuzu ka-90+4.
Ukunqoba kwiSundowns kuchaza ukuthi inethuba lokunqoba iCarling Knockout okwesihlanu njengoba isakwaze ukuyiqukula kane.
