I-PSL iklomelise oweBucs noweDowns ngokushaya into ecokeme
Umqeqeshi we-Orlando Pirates, uJose Riveiro, uklonyeliswe ngokuba umqeqeshi obaqwaqwade emakhanda ngoSepthemba nango-Okthoba kwiBetway Premiership.
Lo mqeqeshi waseSpain uhole amaBhakabhaka anqoba yonke imidlalo yePremieship yokuqala eyisithupha njengoba kusanda kuqala isizini ka-2024/2025.
URiveiro wehlule umqeqeshi wePolokwane City, uPhuti Mohafe, noweMamelodi Sundowns, uManqoba Mngqithi, abebencintisana naye kulo mklomelo.
Umdlali weSundowns, oshisayo kulezi zinsuku, uLucas Ribeiro Costa, uthole umklomelo iBetway Premiership Player of the Month.
Le ngwazi yaseBrazil iyiqale kahle isizini ishaya amagoli amane yase isiza ukwakha amabili, ukulekelela ompetha beligi ukuthi bayiqale kahle isizini.
URibeiro Costa udle umhlanganiso ehlula abadlali bePirates uSipho Chaine, uRelebohile Mofokeng, noDeon Hotto.
Umdlali wasemuva weStellenbosch FC, uFawaaz Basadien, uthole umklomelo iBetway Premiership Goal of the
Month, ngegoli alishaya esengxenyeni yakhe yenkundla bebhekene neCape Town City, e-Athlone Stadium, ngoSepthemba 24 nonyaka.
Amanye amagoli abebhekiwe ahlulwe elikaBasadien, elomdlali weChippa United u-Andile Jali nowePirates uMohau Nkota.
Akumangazi ukuthi kunqobe abePirates neSundowns ngoSepthemba no-Okthoba ngoba womabili la maqembu enza kahle emidlalweni yePremieship, selokhu kuqale isizini.
IBucs isendaweni yokuqala kwilogi yePremieship ngamaphuzu angu-21, kanti Abafana Ba’Style basendaweni yesibili ngawu-18. Womabili amaqembu asedlale imidlalo eyisikhombisa.
Emdlalweni olandelayo weligi iPirates izobhekana neStellenbosch FC e-Orlando Stadium, ngoNovemba 30. ISundowns yona izovakashelwa yiSekhukhune United eLoftus Stadium, ngosuku okufanayo.
