EzakamuvaIbhola

UKaizer Motaung uphiwe isipho sika-R2m uKhoza nePSL

Uthole isipho sika-R2 million usihlalo weKaizer Chiefs, uKaizer Motaung, sivela kusihlalo wePremier Soccer League (PSL), u-Irvin Khoza, ngoLwesithathu.

Enika le nkakha, okuyiyona eyaqala iChiefs isipho, uKhoza uthe kumngani omdala le mali eyokuthi “azitotose nje yena uqobo.”

Phambi kwekomiti lesigungu esiphezulu sePSL, uKhoza ukhulume nomlingani wakhe nomngani wakhe okhulu ngamazwi agcwele ukumhlonipha.

“UKaizer Motaung usebenze kanzima kakhulu kuyona yonke into ayizuzile,” kusho uKhoza.

“Ngizobonele ngawami ubuhlungu obujulile, ukungalali ebusuku nokuzinikela okungenamkhawulo akufakile ukubumba le nqanawe eyiKaizer Chiefs.

“Angisayiphathi eyamagalelo akho ekwakhiweni kweNSL. Uhambo lwakho luyinto eyingqayizivele. Sengathi uMdali angakubusisa.”

Endlini ebigcwele inhlonipho nokushaya ihlombe, uKhoza ube esecela indlu ukuthi imvumele akhiphe lesi sipho.

“Ngakho ngingathanda ukucela amalungu e-Exco ukuthi anginike imvume yokunika uDkt Motaung u-R2 million ukuthi azitotose nje yena uqobo.”

Ngenyanga edlule uMotaung ubehlanganisa iminyaka engu-80 yokuzalwa. Akungabazeki ukuthi uzosithokozela isipho sika-R2 million esivela kuKhoza namanye amalungu ePSL.