Usule isigubhukane umqeqeshi weqembu lePSL

SIHLE NGUBO 

Kungakahlangani namahora angu-24 kuxoshwe uManqoba Mngqithi kwiMamelodi Sundowns, sekusule umqeqeshi weLamontville Golden Arrows, uMabhuti Khenyeza.

Kuvela ukuthi lo mqeqeshi ubengasaneme kuleli qembu likaMato Madlala, oyisikhulu esiphezulu esesibambe iminyaka kwiPremier Soccer League (PSL).

UKhenyeza ubeqeqesha Abafana Bes’thende ngokubambisana noMusa Bilankulu kanjalo noKagisho Dikgacoi. Bonke laba bake bayidlalela i-Arrows phambilini.

I-Arrows igcine ishaye iCape Town City ngo 3-2 ngoDisemba 1, nokuyenze yakhuphukela endaweni yesithupha kwilogi yeBetway Premiership.

Emdlalweni olandelayo izobhekana neRichards Bay FC eMpumalanga Stadium, eHammarsdale ngoMgqibelo ngo-3.30 ntambama.

UMngqithi ochithwe yiSundowns uke wayiqeqesha i-Arrows phambilini. Ngeke kumangaze uma engavumbuka kuleli qembu laseThekwini.

INatal Rich Boyz ayinaye umqeqeshi nayo njengoba usanda kuhlukana noBrandon Truter osecija i-Upington City FC.