ULorch uzophinde acijwe umqeqeshi wePirates njengakudala
SIHLE NGUBO
UThembinkosi “Nyoso” Lorch weMamelodi Sundowns uzophinde aqeqeshwe umqeqeshi weqembu alishiya, uJose Riveira we-Orlando Pirates.
Laba bobabili baseqenjini iCarling All-Star elizobhekana neMagesi FC emdlalweni weCarling Black Label Cup, e-Orlando Stadium, ngoMgqibelo ngo-3.30 ntambama.
IMagesi iyona engompetha beCarling Knockout ka-2024, kanti i-All-Star Team ikhethwe abalandeli njengokohlelo lwabakwaCarling Black Label.
ULorch ushiye iPirates ngoJanuwari nonyaka, kwamangala abalandeli abaningi bePirates abebezifela ngalo mdlali.
Lokhu akubaphathanga neze kahle abalandeli futhi abayifihlanga indlela abazizwa ngayo ezinkundleni zokuxhumana.
Kwale noma esechaza exolisa uLorch, ngokushiya iPirates kungalindele muntu, abalandeli beBucs baqhubeka nokuqanganisa nokubalisa ‘ngokwenzelwa phansi’ yilo mdlali.
Kulezi zinsuku uLorch ujima ngaphansi komqeqeshi wakhe omdala uRiveira, njengoba belungiselela umdlalo weCarling Cup ngoMgqibelo ntambama.
Bakhona nabanye abadlali bePirates azophinde azithole ejima nabo njengakudala uLorch. Kulaba badlali singabala uRelebohile Mofokeng, uPatrick Maswanganyi, uSipho Chaine, uMonnapule Saleng noTshegofatso Mabasa.
Sesilonke iqembu limi kanje:
Abazoqala umdlalo: Siphon Chaine, Aden McCarthy, Asekho Tiwani, Mbekezeli Mbokazi, Jabulani Mokone, Relebohile Mofokeng, Gomolemo Kekana, Bathusi Aubaas, Gaston Sirino, Ashley du Preez, Naledi Hlongwane.
Ebhentshini: Nqobani Biyela, Dimpho Madalane, Xolani Cossa, Akhanyisile Sinoti, Reeve Frostler, Mfundo Vilakazi, Sanele Phiri, Simphiwe Selepe, Monnapule Saleng, Patrick Maswanganyi, Thembinkosi Lorch, Tshegofatso Mabasa