IRoyal AM beyithola u-R27 million kuMasipala uMsunduzi
PHILI HLONGWANE
Iqembu eligijima kwiBetway Premiership, iRoyal AM, belixhaswa uMasipala waseMgugungundlovu, uMsunduzi, ngo-R27 million nokuyimali elingeke lisayithola njengoba lo masipala uzoyinqamula inkontileka.
NgoLwesine Impempe ibike ukuthi umkhandlu uzohlangana ngokushesha ukuzodingida indaba yokuxhasa iRoyal AM edlalela imidlalo yayo yasekhaya eHarry Gwala Stadium, eMgungundlovu.
Ngokolwazi olutholwe yintatheli yeMpempe umkhandlu uhlela ukuyinqamula ngokushesha inkontileka enayo neRoyal AM, njengoba leli qembu linezinkinga zemali esezifaka nomqoqi (wemali) othunywe yiSouth African Revenue Service (SARS).
Umdlalo weBetway Premiership obuzoba phakathi kweRoyal AM ne-Orlando Pirates, eHarry Gwala Stadium, eMgungundlovu, ngoLwesine ebusuku, uhlehlisiwe ngenxa yezinkinga zemali ezibhekene naleli qembu laKwaZulu-Natal.
NoweNedbank Cup Last 32 ebelizowudlala neMilford FC ngoMsombuluko kuyona le nkundla, nawo uhlehlisiwe yiPremier Soccer League (PSL).
Nokho okuvelayo ukuthi iqembu lepolitiki iDemocratic Alliance (DA) yilona elifakela umasipala uMsunduzi ingcindezi, ukuthi unqamule inkontileka yoxhaso ekhona phakathi kwawo neqembu likaShauwn Mkhize.
I-DA ithumele ‘isikhalazo’ lapho iphakamisa khona ukuthi umasipala uMsunduzi uyeke ukuxhasa iThwihli Thwahla, uphinde uziqhelelanise naleli qembu elimaxhapheshu izinkinga.
“I-Democratic Alliance kumasipala uMsunduzi, seyithumele isiphakamiso sokuthi lo masipala ucubungule bese unqamula ngokushesha uxhaso luka-R27 million olubhekiswe kwiRoyal AM,” kusho incwadi yeDA.
“Umasipala awukwazi ukuqhubeka nokweseka ibhizinisi elisolwa ngezinsolo ezinzima zokwephula umthetho, okumbandakanya nokudoja ukukhokhela intela (tax invasion).
“Ukwephula imithetho yokukhokhela intela yicala elibucayi okungamele lithathwe kancane umasipala. Ukuqhubeka nobudlelwano nenkampani ephenywa ngalokhu, kusidicilela phansi isithunzi sikamasipala.
“IRoyal AM ivele isingaphansi kwabaqoqi bemali futhi ayikwazi ukukhokhela abasebenzi bayo amaholo. Leli qembu lihlulekile ukuhlonipha izinkontileka ebelinazo nabadlali asebelishiyile futhi selihlawuliswe kanzima yiFifa.
“Ukuqhubeka nalolu xhaso kulidicilela phansi kakhulu igama likamasipala uMsunduzi.”
Kulindeleke ukuthi umkhandlu umemezele maduze ukuthi uyakunqamula ngokushesha ukuxhasa iRoyal AM.
Ngakolunye uhlangothi i-ExCo yePSL izohlangana ngoLwesihlanu ngo-11 emini lapho kuzocaca khona ukuthi izinkinga zeRoyal AM ziyaxazululeka noma kunesinqumo esinzima okumele sithathwe yiligi yakuleli.