Ochithwe yiBucs uvumbuke kwelidlala kwiChampionship
SIHLE NGUBO
Usegcine elitholile iqembu azodlala kulona umgadli ochithwe yi-Orlando Pirates ekupheleni kwesizini edlule, uKermit Erasmus.
U-Erasmus uhlukane nePirates ngoJuni 7 nyakenye. KwiBucs ukhululwe nonozinti ababili uRichard Ofori, osevimbela AmaZulu FC, uSiyabonga Mpontshane nomdlali wasesiswini uThabang Monare.
Ngemuva kokuhlala izinyanga eziyisithupha ethungatha iqembu, u-Erasmus usesayine kwiCasric Stars egijima kwiMotsepe Foundation Championship.
Lo mgadli, oke wayibamba kwiMamelodi Sundowns, uke wazama inhlanhla kwiChippa United. Kuvele ukuthi abavumelananga ngemali naleli qembu laseGqeberha.
ICasric Stars asayine kuyona isendaweni yesithupha kwilogi yeChampionship. Inamaphuzu angu-24 ngemuva kwemidlalo engu-16.
U-Erasmus unalo ithuba lokusiza leli qembu linyukele kwiPremiership ekupheleni kwesizini njengoba kusasele imidlalo engu-14. ICasric Stars isele ngamaphuzu ayisikhombisa kwiDurban City ezihola phambili ngawu-31 kwilogi yeChampionship.
Leli qembu alikho kwiNedbank Cup nokuchaza ukuthi alinawo umdlalo ngempelasonto. Lizoze libhekane neJDR Stars emdlalweni weligi, eSolomon Mahlangu Stadium, KwaMhlanga, ngoFebhuwari 1.
Kungenzeka u-Erasmus adlale umdlalo wakhe wokuqala kulowo mdlalo njengoba ezothola isonto lonke ukuzilungiselela neqembu lakhe elisha.
