AmaBhokoBhoko

I-Coca Cola izibophezele ekuxhaseni umbhoxo eMzansi

NTOBEKO MZIMELA 

Balokhu banda abaxhasi ebholeni lombhoxo eNingizimu Afrika, kulandela ukuthi inkampani edume umhlaba wonke ngesiphuzo esihlohlozayo, iCoca Cola, imemezele ukuthi iyaqhubeka nokuxhasa lo mdlalo. 

ICoca Cola nenhlangano eyengamele umbhoxo kuleli iSouth African Rugby Union (iSaru) basayine isivumelwano seminyaka emine besebenzisana.

Le nkampani izoxhasa wonke amaqembu esizwe elombhoxo kuleli okubalwa kuwo amaBhokobhoko abesilisa, awabesifazane, amaSevens abesilisa nawabesifazane naqembu abasakhula.

Igama elithi Coca-Cola lizobonakala ezikhindini zawo wonke la maqembu abaliwe ngenhla. Lokhu kuqale ukubonakala ngempelasonto njengoba amaBhokobhoko amaSevens ebedlala ePerth, e-Australia, emzuliswaneni wesibili walo mqhudelwano.

Iqembu lakuleli ligcine liqede endaweni yesine ePerth. Lishaywe osokhaya i-Australia kowandulela owamanqamu, kwathi kowokulwela indawo yesithathu lashaywa yiSpain.

“Ukubambisana kwethu neSaru kugqugquzelwa izifiso ezifanayo nabo, zokukhulisa imiphakathi yakithi ngokuxhasa ezemidlalo,” kusho uSergio Viera oyikhulu esephezulu kwaCoca Cola. 

Lokhu kunanelwe uRiaan Oberholzer oyisikhulu esiphezulu seSaru, othe lobu budlelwano busho lukhulu kubona.

“Ukuqhubeka nalobu budlelwano kuzosiza ekuphumeleliseni iphupho lethu lokuthuthukisa umbhoxo emazingeni aphansi, siphinde sihlangane kalula nabathandi bomdlalo ezweni lonkana,” kusho u-Oberholzer.