Kuxoshwe omunye umqeqeshi weqembu lePSL elizabalazayo

SIHLE NGUBO 

Usekhonjwe eza ngayo ngokushesha uGavin Hunt yiSuperSport United kulandela ukungavumi kwemiphumela.

Amatsatsantsa a Pitori akuwahambeli kahle neze emidlalweni yeBetway Premiership selokhu kuqale isizini.

I-SuperSport isendaweni yesibili ukusuka emsileni ngamaphuzu angu-21 emidlalweni engu-21.

Lokhu kuchaza ukuthi leli qembu lasePitoli likwazi ukuqoqa iphuzu libe linye emdlalweni ngamunye.

Empeleni nje iSuperSport isakwaze ukunqoba imidlalo emihlanu kuphela kwengu-21 esiyidlalile. Kweyisithupha idlale ngokulingana yase ishaywa kweyishumi.

Nokho ukunqoba umdlalo owodwa kungenza iSuperSport inyukele endaweni ka-12 ngoba amaqembu angaphezu kwayo asedlale imidlalo eminingi kunayo.

Kungekudala bekubungazwa ukuhlanganisa imidlalo engu-1000 njengomqeqeshi kukaHunt ebholeni laseNingizimu Afrika.

Konke lokhu akakwazi ukukujabulela kahle uHunt njengoba iqembu lakhe belixhugela waze wakhonjwa eza ngayo.

Kubaqeqeshi asebexoshiwe kule sizini singabala uDan Malesela (Marumo Gallants), uLehlohonolo Seema (Sekhukhune United), u-Eric Tinkler (Cape Town City), uMartin Pablo (AmaZulu FC), uMuhsin Ertugral (Cape Town City), uBrandon Truter (Richards Bay FC), uManqoba Mngqithi (Mamelodi Sundowns) noClinton Larsen (Magesi FC).