UDa Gama usewukhanyise kabusha ugesi weMagesi obusulufifi
SIHLE NGUBO
Umqeqeshi weMagesi FC, u-Owen da Gama, usesuse leli qembu endaweni eyingozi kwilogi yeBetway Premiership walibeka esimeni sokuthi libaleke ezembeni.
UDa Gama ufike kungahambi kahle kwiMagesi, kucaca ukuthi izophinda kwiMotsepe Foundation Championship neCarling Knockout Cup yayo eyinqobe nyakenye.
IMagesi yisizini yayo yokuqala le kwiPremiership kulandela ukunyuka iholwa umqeqeshi uClinton Larsen.
Ifike yazakhela igama ngokushaya i-Orlando Pirates ngo 3-2 emdlalweni weLast 16 yeCarling Knockout Cup.
Sekuwumlando ukuthi iphinde yamangaza abaningi ngokuqukula le ndebe ishaya ompetha beligi iMamelodi Sundowns ngo 2-1 emdlalweni wamanqamu.
Nokho izinto bezingahambi kahle emidlalweni yeligi kwaze kwaba uyashiya uLarsen nobeyiphini lakhe uPapi Zothwane.
Kube sekufika uDa Gama, owake wacija iPirates, zaqala zashintsha izinto komakoti bePremiership.
IMagesi seyinqobe imidlalo emihlanu ilandelana idlalela ekhaya eSeshego Stadium.
Ngempelasonto ishaye iTS Galaxy ngo 2-1, okwenze yanyukela endaweni ka-11 kwilogi yePremieship.
Ngaphambi kwalokho ishaye iStellenbosch FC ngo 1-0, yashaya iLamontville Golden Arrows ngo 1-0, yaphinde yashaya iRichards Bay FC ngo 1-0, kanti neSuperSport United ithole wona lo 1-0 eSeshego Stadium.
Leli qembu lisele ngamaphuzu amabili kuphela kwiKaizer Chiefs esendaweni yesishiyagalombili kwilogi yePremieship.
Lokhu kuchaza ukuthi uma iMagesi iqhubeka nomgqigqo wayo ingazithola igulukudela kwiTop 8 ekupheleni kwesizini.
Kuyacaca ukuthi uDa Gama ufike wawukhanyisa kabusha ugesi weMagesi obusukhanya kalufifi.
