Isiqala ukuba ukhondolo eyokuquleka kushone abadlali bePSL eKZN
SIHLE NGUBO
Ibukeka isiqala ukuba ukhondolo nomkhokha omubi eyokuquleka kwabadlali bashone, emaqenjini ebhola ePremier Soccer League (PSL) aKwaZulu-Natal.
Kushaqeke abalandeli bebhola abaningi ngesikhathi kuvela izindaba zokudlula emhlabeni kukaSinamandla Zondi weDurban City, ngoLwesibili ebusuku.
ICity ibibhekene neMilford FC emdlalweni weMotsepe Foundation Championship, eChatsworth Stadium, eThekwini.
UZondi (22) uvele wawa waquleka ngesikhathi abadlali bezelula ngaphambi kokuqala komdlalo. Ubekhona ohleni lwabadlali abebezoqala umdlalo, kanti ubesedlale imidlalo engu-24 kwiCity kule sizini.
Uphuthunyiswe esibhedlela waqhubeka umdlalo ngethemba lokuthi uzofike athole usizo abe ngcono.
Umdlalo umisiwe sekuzoqala isiwombe sesibili ngesikhathi kufika izindaba ezimbi zokuthi ugcine eshonile.
Ngaleso sikhathi iMilford ibihamba phambili ngo 1-0 nokuyiphenathi eshaywe uSiphosethu Ndlabi ngesiwombe sokuqala.
UZondi ubezobukwa uyise kulo mdlalo okugcine sekumuncu kuwona, esekhala indodana yakhe seyishonile.
“Kuyinto ebuhlungu ukuqinisekisa ukudlula emhlabeni kukaSinamandla Zondi, obaziwa ngelikaSgora, ilungu elithandwayo leDurban City FC,” kusho isitatimende esithunyelwe yiqembu.
“USinamandla ubengeyena nje umdlali onekhono, kodwa ubeyilungu leqembu kozakwabo.”
Akuqali ukuthi umdlali weqembu laKwaZulu-Natal ashone ngale ndlela.
Ngo-2023 uSiphamandla Mtolo owayedlalela iRichards Bay FC, washona kungalindele muntu kade ewumqemane.
Isitatimende seqembu sasithi: “Uwile waquleka ekuseni namuhla ngesikhathi sokuzilolonga. Iqembu alikho esimeni sokunika imininingwane eminingi njengamanje futhi licela umndeni unikwe inhlonipho ngaleli sikhathi esinzima.”
Ngo-2008 umgadli waMaZulu FC, uSiyabonga “Benni” Mkhwanazi, wenzeka into efana ncamashi, wadlula emhlabeni.
Waphuthunyiswa esibhedlela KwaMhlanga ngemuva kokuquleka endlini yakhe ngo-9 ebusuku. Ngebhadi wagcina ngokushona.
Imbangela yokushona kanje kwabadlali ayaziwa kodwa amaqembu kuyomele ayibhekisise ngoba le nto seyiqala ukuba wukhondolo olungeluhle.
