Ukuthola iTop 8 kweChiefs kuncike nasekunqobeni kwiBucs

SIHLE NGUBO 

IKaizer Chiefs kuzomele iyinqobe yonke imidlalo emine yayo esele ukuze ingaphinde ingene ehlazweni lokusala ngaphandle kweTop 8 amasizini elandelana. 

Amakhosi awazange abe yingxenye yeMTN8 kule sizini ngenxa yokuthi aqede ngaphandle kweTop 8 ngesizini edlule.

Njengamanje iChiefs isendaweni yesishiyagalombili kwilogi yePremieship ngamaphuzu angu-31 emidlalweni engu-25.

Inkinga enkulu ebhekene neqembu laseNaturena amaqembu amabili angemuva kwalo okuyiChippa United neLamontville Golden Arrows.

IChippa isendaweni yeshiyagalolunye ngamaphuzu angu-30 emidlalweni engu-23. Abafana Bes’thende basendaweni yeshumi ngamaphuzu angu-29 emidlalweni engu-22.

Lokhu kuchaza ukuthi ukuqhuzuka nje kancane kweChiefs emidlalweni esele kuyosho ukuthi kuphelile ngephupho lokuqeda kwiTop 8.

Amakhosi kuzomele anqobe nakanjani uma esebhekene neMarumo Gallants emdlalweni weBetway Premiership, eFNB Stadium, ngoMgqibelo ngo-3 ntambama.

Ukudlala ngokulingana noma ukushaywa kulo mdlalo kuyosho ukuphela kwamathemba ngokuqeda kwiTop 8.

I-Arrows izobhekana naMaZulu FC emdlalweni wePremiership, eMpumalanga Stadium, eHammarsdale, ngoMgqibelo ngo-3 ntambama.

Umphumela ongavuna iChiefs lapha ukuthi kushaywe Abafana Bes’thende noma okungasenani umdlalo uphele zibambene.

Emdlalweni olandelayo iChippa izovakashela iStellenbosch FC eKapa, ngoLwesithathu. Nalapho iChiefs ingathokozela ukuthi kunqobe iStellies.

Ngemuva kokubhekana neMarumo kuzomele ibhukule kakhulu kunakuqala iChiefs, njengoba izobhekana nezimbangi ezindala i-Orlando Pirates ngoMeyi 3, eFNB Stadium.

Nakulo mdlalo iChiefs akumele ishaywe noma idlale ngokulingana, kodwa kumele inqobe nakanjani.

La maqembu asazohlangana emdlalweni wamanqamu weNedbank Cup, eMoses Mabhida Stadium, eThekwini, ngoMeyi 10.

EzikaNasreddine Nabi zizodlala neSekhukhune United ngoMeyi 17, ngaphambi kokugoqa imidlalo yeligi ngokubhekana nePolokwane City nokuwumdlalo ongeke ube lula neze.

Kuzokhumbuleka ukuthi iChiefs ishaywe ngo 2-0 yiRise and Shine emzuliswaneni wokuqala wemidlalo yeligi.