IChiefs ingase iqukule isicoco seDiski Challenge ngoMgqibelo
SIHLE NGUBO
IKaizer Chiefs idinga amaphuzu amathathu kuphela ukuze ibe ngompetha beDStv Diski Challenge (DDC) ka-2024/2025, ezosongwa maduze nje.
Amakhosi ‘amancane’ athole amaphuzu amathathu namagoli amathathu mahhala, kulandela ukulahlwa kweChippa United yicala ngoLwesine.
Lokhu kuchaza ukuthi iChiefs seyivule igebe lamaphuzu amane phakathi kwawo neStellenbosch FC, njengoba isicongweni.
Wonke amaqembu asele nemidlalo emibili ukuze agoqe isizini. Ukunqoba kweChiefs ngempelasonto kuzoyibeka emaphuzwini angu-67 nokungachaza ukuthi iStellies ngeke isayifica njengoba inangu-60 njengamanje.
IChiefs izobhekana meMagesi FC, eDobsonville Stadium, eSoweto, ngoMgqibelo ngo-10 ekuseni.
Ngaleso sikhathi iStellenbosch izobe itholene phezulu neMarumo Gallants e-Idas Valley Sports Ground ngaye u-10 ekuseni.
IChilli Boys itholwe inecala lokuhluleka ukuya emdlalweni lapho yayizobhekana neChiefs ngoFebhuwari 1. Umdlalo unikwe iChiefs kwathiwa inqobe ngo 3-0.
IChippa iphinde yatholwa inecala lokudlalisa umdlali ongafanele ibhekene neMarumo Gallants ngoFebhuwari 22. Umdlalo unikwe iGallants kwathiwa inqobe ngo 3-0.
Iqembu elizonqoba iDDC lizolibangisa e-England lapho lizodlala imidlalo yobungani namaqembu akhona ehlukene.
Imizuzu engu-90 kuphela (ehambisana namaphuzu amathathu) esihlukanise abadlali beChiefs nohambo oluya kwelamaNgisi.
