Amajita aziphindiselele kwiMorocco eyishaya kwi-Afcon

SIHLE NGUBO 

Iqembu laseNingizimu Afrika le-Under 20 liziphindiselele kwiMorocco ngokuyishaya ngo 1-0 emdlalweni wamanqamu we-Africa Cup of Nations (AFCON) e-Egypt ngeSonto ebusuku.

Ngo-1997 iqembu lesizwe lakuleli lika-Under 17 lafika kowamanqamu we-African Youth Championship eMorocco. Ngaphansi komqeqeshi uShakes Mashaba iqembu lakuleli laguqiswa yoMorocco ngo 1-0.Ngemuva kweminyaka engu-28 selokhu abafana bakuleli bagcina ukufinyelela kowamanqamu, baphinde batholana neMorocco baphindiselela obhuti babo ababeyibamba ngo-1997.

Iqembu lango-1997 lalishaya ngabadlali abafana noJapie Motale, uNkhiphitheni Matombo, uDavid Kannemeyer, uStanton Fredericks, uDaniel Matsau, uManqoba Mkhize noMatthew Booth.

Kulokhu ezikaRaymond Mdaka bezibophele abadlali abafana nonozinti uFletcher Lowe-Smythe, oqokwe njengonozinti ohambe phambili kulo mqhudelwano.

ULowe-Smythe uyibanga ePortugal kanti ubukeka enekusasa eliqhakazile kakhulu.

Bekukhona noMfundo Vilakazi, uSifiso Timba noKutlwano Letlhaku. UMbekezeli Mbokazi we-Orlando Pirates naye wayefakiwe kuleli qembu kodwa wagcina engayanga ngenxa yokuthi iBucs ibimdinga.

Amajita ashaye iNigeria kowandulela owamanqamu ngaphambi kokuthi ashaye iMorocco kowamanqamu ase ebuya nayo indebe.