ISuperSport ingase iqophe umlando omubi selokhu yafika kwiPSL
SIHLE NGUBO
ISuperSport United ingase izithole idlala imidlalo yokuhlunga njengoba kusongwa imidlalo yeBetway Premiership ka-2024/2025 ngoMgqibelo.
Iqembu elizoqeda endaweni ka-15 lizodlala imidlalo yokuhlunga ne-Orbit College kanjalo neCasric Stars, abaqede endaweni yesibili neyesithathu kwiMotsepe Foundation Championship.
Njengamanje iSuperSport inamaphuzu angu-27 kanti ngokwelogi isalelwe yimidlalo emibili ukuthi isonge isizini.
Nokho omunye wemidlalo osele yilowo owamiswa kungu 1-1 ngesikhathi ibhekene neLamontville Golden eLucas Moripe Stadium, ngoFebhuwari 23.
Kwacisha izibani kule nkundla kanti iqembu elalidlalela ekhaya yilona okumele licacise ukuthi lalingacuphile ngani nge-generator, ukuze kugwemeke isimo esenzeka sokumiswa komdlalo.
Lo mdlalo awukho ohlini lwemidlalo yePremieship esele. Ngesikhathi Impempe ibuza i-Arrows ukuthi umdlalo uzoba nini, uMqo Thusi, ongumxhumanisi we-Arrows nabezindaba, uthe: “Silinde iPSL, nathi asazi ukuthi umdlalo uzoba nini nokuthi uzogcina udlaliwe yini.”
Lona kwakungumdlalo kaGavin Hunt ka-1000 njengomqeqeshi ebholeni elikhokhelayo, njengoba wagcina ungaphelanga nje. UHunt ugcine exoshiwe yileli qembu lasePitoli.
Uma umdlalo ugcina ungadlalwanga kubukeka sengathi konke kuzovuna i-Arrows ukuthi inikwe amaphuzu ngoba iphutha (elalingagwemeka) lenziwa yiqembu lasekhaya, iSuperSport.
Ngemuva kweSuperSport kukhona iCape Town City nayo ezabalazela ukuthi ingalubhadi emidlalweni yokuhlunga uma kuphela isizini.
ICityzens inamaphuzu angu-26 kanti isalelwe umdlalo owodwa ezowudlala nomkhaya iStellenbosch FC, eDHL Cape Town Stadium, ngoMgqibelo ngo-3 ntambama.
AmaTsatsantsa a Pitori azobhekana neRichards Bay FC emdlalweni wokusonga isizini ePeter Mokaba Stadium ngoMgqibelo ngo-3 ntambama.
Ukungawunqobi lowo mdlalo bese iCity inqobe kwiStellies, kungazifaka enkingeni enkulu ezikaHunt ezingabanga nesizini enhle.
Kungabe kungokokuqala ngqa ukuthi iSuperSport, esinqobe isicoco seligi kathathu, iyodlala imidlalo yokuhlunga.
NgoLwesibili iSuperSport ishaywe yi-Orlando Pirates ngo 1-0. Igoli libekwe phakathi uMohau Nkota ngomzuzu ka-72.
Leli qembu lasePitoli sekuke kwavela nokuthi lingase lidayisele abafuna ukuvusa iBloemfontein Celtic isitifiketi sayo sokudlala kwiPremiership, uma lisinda ezembeni.
