IDurban City iphunyulile empini kaMagawana kodwa…
SIHLE NGUBO
IKwaZulu-Natal izoqhubeka ibe namaqembu amane kwiBetway Premiership ngesizini ezayo, kulandela ukuwina icala kweDurban City esingompetha beMotsepe Foundation Championship ngokuphelele.
Bekubanjwe umoya eKZN ngecala ebelifakwe yiJDR Stars lokuthi iCity yadlalisa uSaziso Magawana kungafanele ngesikhathi ibhekene nayo.
Nokho ikomiti eliqondisa ubugwegwe lePSL lilichithile icala leJDR Stars ngoLwesibili ebusuku.
“I-Disciplinary Committee yePSL isichithile leso sikhalo kanti iqembu kumele likhokhe izindleko zecala. Lapha sikhuluma ngeJDR Stars,” okusho umshushisi wePSL uZola Majavu.
“Ikomiti eliqondisa ubugwegwe lePSL aliwutholanga ugcobho ngokubhaliswa kukaMagawana yiDurban City.
“Ekutheni wadlaliswa ngesikhathi bebhekene neJDR Stars akukho okutholwe yikomiti okuphuma eceleni.”
ICape Town Spurs nayo ifake icala ngomdlali ofanayo ngeSonto kodwa akubonakali kukhona okuzoshintsha ngesinqumo sekomiti eliqondisa ubugwegwe lePSL.
“Icala elifakwe yiCape Town Spurs ngomdlali ofanayo lizohlalelwa ngoLwesithathu njengoba iSpurs ithi izofika nofakazi,” kuqhuba uMajavu.
UMagawana ubedlalela iMarumo Gallants ngesizini edlule kodwa ngesikhathi esayiniswa yiCity kuvela ukuthi wayevele engasenaqembu.
Ngesizini ezayo iKZN izobe ineDurban City, iLamontville Golden Arrows, AmaZulu FC neRichards Bay FC.
Ezehla kamnandi kubalandeli bebhola baseMhlathuze ukuthi iNatal Rich Boyz izodlalela imidlalo yayo yasekhaya eMhlathuze Sports Complex ngesizini ezayo.
Le nkundla beyilungiswa nobekuphoqa iBay ukuthi idlalele imidlalo yayo yasekhaya eKing Zwelithini Stadium, eMlaza.
*Emdlalweni weBetway Premiership odlalwe ngoLwesibili ebusuku, i-Orlando Pirates ishaye iSuperSport United ngo ngo 1-0. Igoli lishaywe uMohau Nkota ngesiwombe sesibili.
