Ingwazi yeDowns ithi akukho lutho emgodleni kaCardoso
SIHLE NGUBO
Ingwazi yeMamelodi Sundowns, uJoel “Fire” Masilela, ithi akafanelwe ukuqeqesha leli qembu laseChloorkop uMiguel Cardoso.
Ukhuluma kanjena nje uMasilela iSundowns ishaywe yiPyramids SC yase-Egypt kowamanqamu weCAF Champions League ngeSonto.
IPyramids igcine idlule ngo 3-2 kulo mdlalo uma sekuhlanganiswe amagoli emilenze yomibili.
ELoftus Stadium iSundowns nePyramids babambane ngo 1-1 emlenzeni wokuqala, kwathi kowesibili kwanqoba ezase-Egypt ngo 2-1 e-30 June Stadium, eCairo.
UMasilela, owayeyibamba kwiSundowns ngabo-1990, ubona ebenzele phansi uCardoso kade sebeyibhekile indebe.
“Besilindele lukhulu kwiSundowns. Ukuhlulwa akukho mayelana nomdlalo wangeSonto kuphela,” kusho uMasilela ekhuluma kwiRadio2000.
“Kwaqala emlenzeni wokuqala. Ngokomdlalo asenzanga neze kahle.
“Abadlali abangena besuka ebhentshini abenzanga kahle. Abadlali ababengenza into ebhekile babebekwe ebhentshini, futhi angikhulumi ngoThemba Zwane kuphela…uCardoso akayona indoda efanele.”
Abalandeli abaningi beSundowns bakhala ngokungadlaliswa kukaZwane noPeter Shalulile kule milenze emibili yomdlalo wamanqamu weChampions League.
Bakholwa ukuthi ukube laba badlali bebeyiqala imidlalo iSundowns ibizokwenza kangcono ngoba banamava emidlalweni yeCAF.
“Isitayela (sethu) sokudlala sesishintshile. Sidlalela emuva kakhulu,” kuqhuba uMasilela.
“Akuyona iSundowns leyo. ISundowns ifana neBarcelona nePSG. Kumele sidlale ibhola elihlaselayo.
“Yingakho sibizwa ngamaBrazilians. Singadedela amagoli amabili kodwa kumele sishaye amane. Mhlawumbe bazothi ngixova izinto kodwa uCardoso akayilungele iSundowns.”
UCardoso ungene esikhaleni sikaManqoba Mngqithi nokuyinto eyayingalindelekile ukuthi iSundowns ixoshe umqeqeshi ngasekupheleni konyaka odlule.
Ngaleso sikhathi Abafana Ba’Style bese bephuthwe yiMTN8 neCarling Knockout Cup, eshaywe kuyona yiMagesi FC kowamanqamu.
“Asizange sidlale kahle kulo mqhudelwano (iChampions League). Besinenhlanhla nje kweminye imidlalo. Asikhulume iqiniso, asinaye umqeqeshi osezingeni eliphezulu.
“Angifuni ukungamhloniphi uFlemming Berg kodwa akalazi nhlobo usiko lweqembu.
“Uvela kuphi vele? Kumele naye akhonjwe ngenjumbane kulokhu.
“Lonke ithimba labaqeqeshi kumele libhekane ngqo nalesi simo. Akumele sicheme, kufanele sibe neqiniso. Basenzele phansi futhi basazophinda basigile.”
Kuzocaca maduze ukuthi iSundowns izomchitha yini uCardoso. Ekupheleni kwesizini edlule ichithe uRulani Mokwena osanda kuhlukana neWydad Athletic Club yeseMorocco, ayijoyine kuqala isizini ka-2024/2025.
