Seyiswele umsila ngokulayezela kwabasafuna amathikithi edabhi
By Sihle Ngubo
Labo abebelinde ukuthi bazothenga amathikithi omdlalo weKaizer Chiefs ne-Orlando Pirates weNedbank Cup uma sebeshayisile emsebenzini ngoLwesihlanu ntambama, abakhohlwe.
La maqembu aseSoweto azotholana phezulu emdlalweni owandulela owamanqamu weNedbank Cup eFNB Stadium, ngoMgqibelo ngo-3 ntambama.
Amathikithi kuqinisekiswe ukuthi asephele nya ngoLwesihlanu ngo-11 ekuseni.
Lokhu kuchaza ukuthi abangenawo amathikithi akumele bazihluphe ngokusondela enkundleni ngoMgqibelo.
Kakade amathikithi awasadayisi enkundleni ngoba kusuke kubalekelwa isinyokotho nokubangisana ngaphandle kwenkundla.
IChiefs nePirates baya kulo mdlalo nje izinto azihlangani kahle kuMakhosi agcine eshaywe yiSwallows FC ngo 2-1 koweligi ngoMsombuluko.
Ngasohlangothini lweBucs igcine ibambane neRoyal AM 1-1 koweligi nokuyibeka ethubeni elikahle lokuqeda endaweni yesibili kwilogi okuhambisana nokuyodlala kwiCAF Champions League.
FUNDA NALA: Ukuzenzela kweKaizer Chiefs kwiPirates kwidabhi akusho lutho
IPirates iphinde ibe nethuba lokuqukula izindebe ezimbili kule sizini uma idlula kwiChiefs ngoMgqibelo. Ivele seyithathe iMTN8 eyiwine ngokushaya AmaZulu FC ngo 1-0 kowamanqamu.
IChiefs yona idinga ukubuyisa isithunzi ngokuwina indebe okokuqala ngemuva kweminyaka eminingi. Lokhu kungasusa ingcindezi kumqeqeshi wayo u-Arthur Zwane.
