I-Arrows iwole abadlali beWanderers engomakoti kwiChampionship
SIHLE NGUBO
ILamontville Golden Arrows ilande abadlali abayisithupha kwiMidlands Wanderers, esanda kunyukela kwiMotsepe Foundation Championship, yabasayinisa ngokushesha.
Leli qembu laKwaZulu-Natal beliyibambe emidlalweni yokuhlunga kazwelonke ye-ABC Motsepe League ebibanjelwe ePitoli ngesonto eledlule.
IWanderers igcine ilale isithathu kule midlalo enqotshwe yiGomora United yaseGauteng.
Elinye iqembu elinyukele kwiChampionship yi-The Bees yaseMpumalanga eshaywe yiGomora kowamanqamu.
Kulokhu bekunyuka amaqembu amathathu ngenxa yokuxoshwa kweRoyal AM yiPremier Soccer League (PSL) ngesizini edlule.
Abafana Bes’thende balungiselela isizini ezayo, yingakho belande uNtandoyenkosi “Beast” Mabaso, uSiboniso “Mancu” Madonsela, uPhilani “Peekay” Khumalo.
Kukhona noNhlanhla “Lulu” Gasa,u-Alwande “Bhubesi” Booysen noMfanuvela “Mayambela” Mafuleka.
Laba badlali kulindeleke ukuthi babonakale uma i-Arrows seyidlala kwiKZN Premier’s Cup ngoJulayi 26, eMhlathuze Sports Ground.
Abafana Bes’thende bazotholana phezulu naMaZulu FC emdlalweni owandulela owamanqamu ngoMgqibelo (Julayi 26) ngo-9 ekuseni.
UKagiso Dikgacoi, oyiphini lomqeqeshi kwi-Arrows, ukholwa ukuthi lo mqhudelwano uzobasiza kakhulu ngaphambi kokuqala kwesizini entsha.
“Sijabule kakhulu ngalo mdlalo, ngeke ube lula,” kusho uDikgacoi oke wadlala kwi-Arrows neBafana Bafana.
“Lona umdlalo esifuna ukuwunqoba ukuze sibone ukuthi sesikuphi namalungiselelo esizini entsha.”
Uncome kakhulu amagalelo omqeqeshi uManqoba Mngqithi ofike isizini seyiqalile kuBafana Bes’thende.
“Besingenzi kahle kwaze kwaba kufika umqeqeshi (uManqoba Mngqithi),” kusho uDikgacoi.
“Ufike nomqondo wokufuna ukuthi abadlali baphushe kakhulu, okuyinto ebingekho engakafiki.
“Uphinde wazama ukushintsha isimo emagunjini okushintshela ngendlela abadlali abacabanga ngayo.
“Kubukeka kuhamba kahle konke yize singazange singene kwiTop 8, okuyinto ebesifuna ukuyifeza ngesizini edlule.
“Ungumuntu othanda ukunqoba imidlalo. Useyinqobile imidlalo nezindebe neMamelodi Sundowns.
“Sethemba ukuthi sizokwenza lokho kwi-Arrows ngesizini ezayo, ngabadlali ebesivele sinabo nalabo esizokwengeza ngabo.
Le midlalo yeKZN Premier’s Cup izophethwa ngeSonto ngo-4 ntambama, kanti kuzobe kudlala wonke amaqembu aKwaZulu-Natal agijima esigabeni esikhokhelayo.
