Okwenze iChiefs imshiye uKhama Billiat iya ekhempini
Alfred Ngubane
UKhama Billiat uzithole esehlangabezana nokuthi engahambi neKaizer Chiefs ngesikhathi iya ekhempini yayo yokuqala yokulungiselela isizini ezayo.
Le khempu yeChiefs iseMpumalanga kanti uBilliat akabanga yingxenye yabadlali abahambile. Ubekhona ngesikhathi iqembu liqala amalungiselelo eNaturena.
Kuvele ke uKhama Billiat uphelelwe yinkontileka kuleli qembu. Kodwa kuvela ukuthi izovuselelwa kodwa ngemibandela eqinile.
“Izikhulu zimnike umbandela wokuthi kumele avume ukwehliselwa umholo uma kungenjalo kuzomele aphume ngesango,” usho kanje umthombo weMpempe.
Kulindeleke ukuthi izingxoxo ngekusasa lakhe ziphothulwe maduze nokuyilapho kuzobe sekuhlaluka khona ukuthi uyahlala noma uyahamba.
UKhama Billiat usehlale amasizini amane kwiChiefs kodwa ayikho into ebambekayo asayenzele leli qembu njengoba ingekho indebe ayifakile ekhabetheni.
“Okunye wukuthi uhlushwa kakhulu ukulimala okuyikho obekwenza ahlale ngaphandle isikhathi eside. Namanje akwaziwa ukuthi uselunge kangakanani.
“Yikho ke lokho okungenza iqembu limkhulule ukuthi ayozama kwenye indawo,” kusho umthombo.
Kuzokhumbuleka ukuthi Impempe ike yabika ukuthi iChiefs ikhiphe izimali ezishisiwe yelapha lo mdlali ngasekupheleni kwesizini edlule.
Lokhu bekungenxa yokuthi umqeqeshi wangaleso sikhathi, u-Arthur Zwane uyamthanda futhi ubeboba kusekuningi angakwenzela iqembu.
Yingakho nenkontileka yokuvuselela ayesenikiwe kodwa yabuye yahoxiswa ngesikhathi usihlalo weqembu uKaizer Motaung ekhala ngokuthi kumele kulungiswe okuthile.
Lokhu kwakulandela ukubhacaza kweqembu emdlalweni wokugcina weligi la lashaywa khona yiCape Town City.
Yingakho ke manje esenikwe entsha enemali eyehlisiwe okumele anqume ukuthi uyayamukela yini noma uyashiya.
UKhama Billiat ufike kwiChiefs esuka kwiMamelodi Sundowns la ayeyisihlabani esinofakazi khona. Kodwa selokhu afika eNaturena akwenzeki nhhlobo.
Kuzokhumbuleka ke nokuthi owake waba ngumdlali kwiMamelodi Sundonws neChiefs uKatlego Mphela wake wakuveza ukuthi iSundowns ayimdedeli umdlali esewusizo.
Kodwa imdedela ngoba osephelelwe ngushatini. Kula masizini ekhona uBilliat ubebonakala ukuthi udonsa kanzima ekusizeni iqembu.
FUNDA NALA: IChiefs ‘iphahlukile’ ngo-Alexander osanonyaka osele kwinkontileka
Uma ke kwenzeka enquma ukushiya kwiChiefs, uBilliat cishe uzosheshe alithole ikhaya elisha njenfoba iYoung Africans yase Tanzania yaveza ukuthi ingamthatha uma kwenzeka etholakala mahhala.
