IPirates isayinise omunye umdlali weBafana Bafana
SIHLE NGUBO
I-Orlando Pirates seyiphinde yasayinisa omunye umdlali weBafana Bafana, kulandela ukwethula ngokusemthethweni uKamogelo Sebelebele obedlalela iTS Galaxy.
Lokhu kuqinisekiswe yilona leli qembu okuyimanje liseSpain lilungiselela isizini entsha yeBetway Premiership.
USebelebele ulandela omunye umdlali weBafana osayine kwiBucs emasontweni edlule, u-Oswin Appolis obekwiPolokwane City.
Kukhona noYanela Mbuthuma obedlala kwiRichards Bay FC noTshepang Moremi obedlala kuMaZulu FC, okungabadlali asebeke babizwe eqenjini lesizwe.
“I-Orlando Pirates Football Club inentokozo ukumemezela ukusayina kukaKamogelo Sebelebele,” kusho isitatimende sePirates.
“Lo mdlali oneminyaka engu-22 ujoyina iBucs ngemuva kokudlala kahle kwiTS Galaxy, lapho edlale imidlalo engu-29 washaya amagoli amahlanu.
“USebelebele uzojoyina abadlali abasale eGoli ngesikhathi abanye beyolungiselela isizini eSpain.”
Leli qembu laseSoweto liseMarbella lapho lisalelwe yimidlalo emibili yobungani elizoyidlala namaqembu aseSpain, iLas Palmas neGranada, ngaphambi kokubuyela ekhaya ngoJulayi 20.
IPirates idlale neBolton Wanderers yase-England lapho ishaywe khona ngo 2-0.
Emdlalweni wesibili ngeSonto iBucs ibambane nePafos ngo 1-1.
Lo mdlali kulindeleke ukuthi afike eshise umbango eqenjini lika-Abdeslam Ouaddou okubhekeke ukuthi livikele indebe yeMTN8 eliyithathe ngesizini edlule.
