‘Buzani uRulani,’ kusho oweGalaxy ngokulimala kukaParker

Umqeqeshi weTS Galaxy, uSead Ramovic wenqabile ukwanda ngokulimala kukaBernard Parker olimale emdlalweni wabo neMamelodi Sundowns ngoLwesithathu.

UParker ugxotshwe uBongani Zungu kabuhlungu, wamhlephula umlenze kulo mdlalo weCarling Knockout Cup obuseMbombela Stadium.

Ngemuva komdlalo abeSundowns bakuzibile ukukhuluma ngalesi sehlakalo futhi kuze kube manje bebengakaxolisi ngokwenzeke kuParker.

Yize kungangatshazwa ukuthi uZungu akakwenzanga ngenhloso lokhu, kodwa ukuthula kwakhe neSundowns ngalokhu kuyaxaka.

URamovic uthe umuntu ongakwazi ukuphendula kahle ukuthi ngabe uZungu uyayibona yini ukuthi lento ayenze kuParker ingaqeda ngekusasa lakhe uMokwena.

“Akayena umdlali wami, lowo mbuzo kumele uwubhekise kuRulani Mokwena,”kusho uRamovic kwi-iDiski Times.

“Angifuni ukuphawula ngoba wonke umuntu ubonile ukuthi kwenzekeni nokuziphatha (kukaZungu).

“Kodwa engikwaziyo nengikholelwa kukho wukuthi uZungu akakwenzanga ngabomu lokhu.

“Into enjengale eyenzekile, ngiyazi uma esebona izithombe zayo naye uzoshaqeka.

“Nginesiqiniseko uzoyifuna inamba kaParker ukuze axolise. NeSundowns ngokunjalo ngoba bayiqembu elisengeni eliphezulu.”