Umdlali weChiefs uzothola umklomelo weNedbank Cup nakanjani
SIHLE NGUBO
Uzokhethwa kubadlali beKaizer Chiefs umdlali oshaye into ecokeme kwiNedbank Cup ka-2025, okunguyena ozokhala emuke nomklomelo.
Lokhu kuhlaluke ngesikhathi iPremier Soccer League (PSL) imemezela abadlali abasethubeni lokuthola imiklomelo uma seyenza umcimbi wayo wokuklomelisa abadlali abenze kahle, waminyaka yonke.
IChiefs yenze kahle kulo mqhudelwano njengoba igcine inqobe iNedbank Cup ngokushaya i-Orlando Pirates ngo 2-1 kowamanqamu eMoses Mabhida Stadium, eThekwini, ngoMeyi.
Endleleni ebheke kowamanqamu Amakhosi ashaye iChippa United, iStellenbosch FC neMamelodi Sundowns, phakathi kwamaqembu adlale nawo.
Abadlali beChiefs abanethuba lokuthola umklomelo iNedbank Cup Player of the Tournament, u-Inacio Miguel, uPule Mmodi noGaston Sirino.
Bonke laba badlali bashaye into ecokeme ukusiza Amakhosi ukuthi aqukule iNedbank Cup obekuyindebe yokuqala ukuyinqoba ngemuva kweminyaka eyishumi.
Umdlali wePirates oyedwa naye uzothola umklomelo iNedbank Cup Promising player of the Tournament, njengoba kubanga abaleli qembu bodwa kulo mklomelo.
Kuzokhethwa phakathi kukaRelebohile Mofokeng, uMbekezeli Mbokazi noMohau Nkota, bonke abadlale kahle ngesizini edlule.
KwiMTN8 Last man standing iPirates inethuba lokuthola omunye umklomelo yize kungebona abadlali bayo bodwa abazobanga lo mklomelo.
IBucs inqobe indebe yeMTN8 ekuqaleni kwesizini edlule ngokushaya iStellenbosch FC ngo 2-1, kowamanqamu eMoses Mabhida Stadium.
Kulo mklomelo kubanga uRelebohile Mofokeng, uDeon Hotto (bePirates) noFawaaz Basadien weStellenbosch FC.
IChiefs izobheka ukuthola omunye umklomelo kwiDStv Diski Challenge (DDC) Player of the season.
Leli qembu yilona elikhale lemuka nendebe yeDDC ebigubha iminyaka eyishumi yaba khona, ngesizini edlule.
Ababanga umklomelo uGomolemo Kekana weMamelodi Sundowns, uNtandoyenkosi Nkosi weChiefs noTylon Smith weStellenbosch FC.
Lo mcimbi bekumele ube ngasekupheleni kukaMeyi kodwa wahlehliswa ngoba ompetha beligi iSundowns, bebeyodlala kwiFifa Club World Cup ebise-USA.
Lo mqhudelwano usongwe ngeSonto kanti iChelsea FC iyona ebe ngompetha kulandela ukushaya iParis Saint-Germaine yaseFrance ngo 3-0 kowamanqamu.
