Ama-Boks aqhubekile nokunqoba ebhaxa iGeorgia
SIHLE NGUBO
INingizimu Afrika iqhubekile nokunqoba ishaya iGeorgia ngo 55-10 emdlalweni weCastle Lager Incoming Tour, eMbombela Stadium, eNelspruit, ngoMgqibelo.
AmaBhokobhoko aye kulo mdlalo eshayela phezulu ngemuva kokudedela isibhaxu sika 45-0 kwi-Italy eNelson Mandela Bay Stadium, ngempelasonto edlule.
I-Georgia iyona eqale kahle umdlalo kucaca ukuthi ibingafuni ukushaywa kalula amaBhokobhoko.
UVano Karkadze ushaye itry yokuqala ngomzuzu wesithathu kwaba ngu 7-0, ngemuva kwime-conversion kaLuka Matkava.
Ibuyile iNingizimu Afrika uBoan Venter wabeka itry ngomzuzu wesishiyagalolunye kwaba ngu 7-5.
USacha Feinberg-Mngomezulu uyishwebile i-conversion, yize beyibukeka ilula.
Aphinde agadla amaBhokobhoko uMarnus van DER Merwe, obedlala okokuqala kwelesizwe, eshaya itry yesibili yeqembu ngomzuzu ka-14, ahamba phambili okokuqala ngo 10-7.
Ngemuva kwemizuzu emihlanu iqembu lasekhaya liphaselane ibhola kamnandi, uCannon Moodie washaya itry ngomzuzu ka-19 kwaba ngu 15-7.
Uphinde wayishweba i-conversion uMngomezulu. Iphenathi kaLuka Matkava ngomzuzu ka-29 yenze kwaba ngu 15-10.
Abesevutha amaBhokobhoko wabuya uVan DER Merwe ngomzuzu ka-32 washaya itry yakhe yesibili. Kulokhu uMngomezulu uyibeke phakathi i-conversion kwaba ngu 22-10.
Isiwombe sesibili siqale amaBhokobhoko esavutha bhe, eyicindezela iGeorgia.
Ngomzuzu ka-47 u-Edwill van DER Merwe ushaye itry yesihlanu yeqembu lasekhaya, lahamba phambili ngo 27-10.
Eyesithupha itry ize noDamian Willemse, obesuka ebhentshini eshintsha u-Aphelele Fassi, ngomzuzu ka-57.
UHandre Pollard, naye ongene endaweni kaMngomezulu, ushaye i-conversion kwaba ngu 34-10.
Ushaye itry yesibili u-Edwill van DER Merwe ngomzuzu ka-73, kwacaca ukuthi sekuphele nya nge-Georgia.
U-Arendse ushaye-try ngomzuzu ka-79, kwathi uPollard washaya eyokugcina ngomzuzu ka-80.
Kulo mdlalo kubonakale ukaputeni uSiya Kolisi ehola amaBhokobhoko okokuqala nonyaka.
