Baninga ukuqala izigaba ezimbili kwiWorld Test Cricket
Kuhlongozwa ukuthi kube nezigaba ezimbili zeTest Championship, ezimbandakanya amazwe angu-12 adlala imidlalo yeTest kwikhilikithi emhlabeni.
USanjog Gupta wase-India, uRichard Gould wase-England noTodd Greenberg wase-Australia, bazohola ithimba elizohlola isiphakamiso sokuthi kube nezigaba ezimbili emidlalweni yeTest kwikhilikithi.
Bazonikwa ithuba lokuhlanganisa amakhanda kuze kube sekupheleni konyaka, ukuze baqhamuke nokuthile.
I-Australia kuvela ukuthi ivele iyahambisana nalesi siphakamiso ngakho sekubhekwe amanye amazwe ukuthi wona athini.
Kunamazwe angu-12 adlala imidlalo yeTest emhlabeni. Isigaba ngasinye sizoba namaqembu ayisithupha.
Esigabeni esiphezulu kuzoba namaqembu ayisithupha aphezulu ngokukleliswa yi-International Cricket Council (ICC).
Njengamanje amazwe aphezulu yi-Australia, iNingizimu Afrika, i-England, yi-India, iNew Zealand neSri Lanka.
Esigabeni sesibili, esizokwakhiwa amaqembu akleliswe kunombolo 7 kuya ku-12, njengamanje yiPakistan, iWest Indies, iBangladesh, iZimbabwe, i- Afghanistan ne-Ireland.
Iqembu elizoqeda endaweni yesithupha esigabeni sokuqala lizodliwa yizembe, bese kukhuphuka elizoqeda phezulu esigabeni sesibili, uma sekuphele umjikelezo weWorld Test Cricket (WTC).
Lolu hlelo kulindeleke ukuthi luqale ngomjikelezo oqala ngo-2027 usongwe ngo-2029.
Amaqembu ayisithupha azodlala imidlalo ewuchungechunge yeTest emihlanu lilinye.
Uma udlala imidlalo ewuchungechunge emibili ekuhambeni, bese udlale emithathu ekhaya kumjikelezo wokuqala, kusho ukuthi uzodlala emithathu ekuhambeni nemibili ekhaya emjikelezweni olandelayo.
Okunye abafuna kwenzeke ukuthi umdlalo owuchungechunge ube nemidlalo emithathu yeTest, hhayi ngaphansi kwalokho.
Uzodlala nawo wonke amaqembu esigabeni sakho emjikelezweni.
Njengamanje amaProteas iwona angompetha beWorld Cricket Championship kulandela ukushaya i-Australia eLord’s Cricket Ground, e-England, ngenyanga edlule.
