Owayedlalela iBafana Bafana usezoqeqesha kwiSpanish La Liga
SIHLE NGUBO
Owayengumdlali weBafana Bafana, uQuinton Fortune, uzothola ithuba eliyingqayizivele lokucija iqembu elidlala kwenye yamaligi yamakhulu emhlabeni, iSpanish La Liga.
UFortune, owake wadlalela iManchester United, uyiphini likaVeljko Paunovic kwiReal Oviedo yaseSpain.
Bobabili laba baqeqeshi basanda kwelulelwa izinkontileka kulandela ukwenyusela iqembu esigabeni esiphezulu eSpain.
Basayine inkontileka yonyaka emunye ngemuva kokuhlanganisa imiqondo, benyusa iqembu okokuqala ngqa eminyakeni engu-24, lingabonwa kwiLa Liga.
Leli qembu kuvela ukuthi lizomgcina umdlali walo osekhulile uSanti Carzola owake wadlalela i-Arsenal.
UFortune udlalile eSpain kusukela ngo-1995 lapho ebegijima kwiMallorca.
Uphinde wadlala kwi-Athletico Madrid B phakathi kuka-1996 no-1999, kanti uke wadlala nemidlalo embalwa eqenjini elikhulu.
Ngemuva kwalokho uhehe iso lika-Alex Ferguson, obecija iManchester United, wasayina kuleli qembu elihlonishwayo e-England ngo-1999.
KwiMan United uhlale kwaze kwaba u-2006, kanti ngemuva kwalokho ujoyine iBolton Wanderers.
Eqenjini lesizwe, iBafana Bafana, udlale imidlalo engu-46 washaya amagoli amabili, phakathi kuka-1996 no-2005.
Phakathi kuka-2020 no-2023 ubeyiphini lomqeqeshi kwiReading yakhona e-England.
Useke waba yiphini lomqeqeshi kwiGuadalajara neTriges UANL, okungamaqembu aseMexico.
IReal Oviedo izobhekana neGetafe ngoJulayi 26, kanti uzothola ithuba lokubhekana neqembu lakhe lakudala, i-Athletico Madrid ngoNovemba 30.
