Indida ‘ngokunyamalala’ kowayedlala kwiDowns neBafana

SIHLE NGUBO

Iyindida ‘eyokunyamalala’ kowayengumdlali weBafana Bafana neMamelodi Sundowns, okuthiwa sekuphele amasonto engaziwa ukuphi, uThando Mngomeni.

Kuvela ukuthi sekucisho kuzohlangana inyanga uMngomeni engaziwa ukuthi ukuphi, nokuyinto ewukhathazayo umndeni, abangani nezihlobo.

UMngomeni uke wadlala nakwiSantos neBidvest Wits emaqenjini ebhola aseNingizimu Afrika.

Umnewabo uThabo Mngomeni oke wadlala kuMtata Bucks ne-Orlando Pirates.

UThabo ucashunwe yiSunday Times ethi: “Angifuni ukukhuluma kakhulu ngalolu daba kuze kube sengixoxile nentombi yakhe.”

Akalubambanga ucingo ngesikhathi Impempe imfonela izama ukuthola ukuthi useke waxoxa yini nentombi kaThando ukuthola ukuthi yamgcina nini.

Kunowesifazane okhulume no-Andile Ncube kwiSports Amplified ozibize ngoPalesa, wathi uyintombi kaThando.

Uthe uMngomeni uphila saka futhi yena uyakhuluma naye njengesithandwa sakhe.

“Okwamanje useKapa kodwa uzogibela ibhanoyi eze eGoli,” kusho uPalesa.

“Ayikho into yokuthi ulahlekile uyaphila, sidla ama-cheese cake thina naye.

“Ngike ngamtshela ukuthi akenze iVN ukuze abantu bazi ukuthi uyaphila…”

Okuxakayo ukuthi kungani kubo kaThando kuthiwa udukile kodwa intombi yakhe ithi yona uphila saka.