Iqembu lePSL lisolwa ‘ngokuntshontsha’ abadlali belinye lePSL
SIHLE NGUBO
Kufufusa umbango wabadlali emaqenjini aKwaZulu-Natal, iRichards Bay FC, edlala kwiBetway Premiership, neMidlands Wanderers esanda kukhuphukela kwiMotsepe Foundation Championship.
IWanderers, yaseMgungundlovu, isizodlala kwiChampionship kulandela ukulala isithathu emidlalweni yokuhlunga kazwelonke ye-ABC Motsepe League, ebesiPitoli emasontweni edlule.
Ukudlala kahle kwaleli qembu ngesizini edlule, kwi-ABC Motsepe League KwaZulu-Natal, kwenze abadlali balo baba yinyama kwamanye amaqembu akulesi sifundazwe.
Muva nje kuvela ukuthi iNatal Rich Boyz ‘intshontshe’ abadlali beWanderers ngemuva komdlalo wokunquma ukuthi iliphi iqembu ebelizoya kwekazwelonke, eKing Zwelithini Stadium.
Nangesikhathi kuqhubeka imidlalo yePremier’s Cup, eMhlathuze Sports Complex, ngempelasonto, kukholakala ukuthi kunomdlali weWanderers obempitshwe yiBay ifuna ukumthatha ngozwane.
Lo mdlali udlala emuva maphakathi kanti uyinxele okungadluleki kulona kalula.
Kuthiwa abaphathi beWanderers abeneme nhlobo ngalokhu ngoba iBay ayizange ikhulume nabo ngabadlali.
Abadlali abathintekayo lapha uLuyanda Khumalo no-Olwethu Mbambo.
“ULuyanda Khumalo uqokiwe esikwatini sika-Under 21 ngemuva kweKhabba Cup,” kusho umthombo weMpempe.
“Ngemuva kwalokho uye kubo, nokuthe uma esuka lapho washaya sengathi ubuyela eMgungundlovu (kwiWanderers).
“Abazali bafikile bezobona umfana kwiPremier’s Cup ngempelasonto, bamangala sebebona eqhamuka egqoke izinto zeBay. Nabo bebengazi ngalokhu.”
Impempe izame kaningi ukuthola usihlalo weWanderers, uVincent “Masenti” Myeni, ukuthi aphawule ngalolu daba kodwa wangalubamba ucingo.
UJonty Zungu weBay ulubambile ucingo wathembisa ukubuyela entathelini kodwa wagcina engakwenzanga lokho.
Ngemuva kwemidlalo yokuhlunga ye-ABC Motsepe League, iLamontville Golden Arrows ilande abadlali abayisithupha beWanderers.
Labo badlali uNtandoyenkosi “Beast” Mabaso, uSiboniso “Mancu” Madonsela, uPhilani “Peekay” Khumalo.
Kukhona noNhlanhla “Lulu” Gasa,u-Alwande “Bhubesi” Booysen noMfanuvela “Mayambela” Mafuleka.
Nokho Abafana Bes’thende bahambisa ngendlela efanele njengoba bakhuluma neWanderers, bangayihamba ngemuva mayelana nalaba badlali.
