UMpambaniso angase aphambanise amakhanda abaningi kwiPSL

SIHLE NGUBO

ICape Town City FC ingase izithole ibuyela kwiBetway Premiership uma isinqumo secala elifake ngeMarumo Gallants sivuna yona.

ICityzens ivunwe yicala ebelikumehluleli weSafa ukuthi ikomiti lePremier Soccer League (PSL) liqale uphenyo ngokudlaliswa komdlali ngokungenamvumo.

Ukunqoba leli cala kuzosho ukuthi leli qembu laseKapa lizobuyela kwiPremiership bese kucaciswe ukuthi kwenzekani ngeGallants.

Indaba ithinta umdlali uMonde Mpambaniso, odlale imidlalo engu-20 yeGallants ngesizini edlule.

Kuvela ukuthi lo mdlali ubedlala kuleli qembu engenayo incwadi emkhululayo ukuthi alidlalele (clearance certificate).

Uma iGallants itholakala inecala izothathelwa wonke amaphuzu ewathole ibophele lo mdlali.

Ekupheleni kwesizini edlule iHighlands Park iphucwe amaphuzu angu-62 kade ibe ngompetha be-ABC Motsepe League eGauteng.

Leli qembu lilahlwe yicala lokudlalisa uFranklin Ogbonna, waseNigeria, engenayo i-visa esemthethweni yokuzofunda eNingizimu Afrika.

IHighlands Park idliwe yizembe yayositha kwi-Ekurhuleni Regional League.

Uma iGallants ilahlwa yicala kukhona okuzoshintsha emsileni kwilogi yePremieship kanti lokhu kuthinta nemali etholwa amaqembu ekupheleni kwesizini.

ICityzens idliwe yizembe ngemuva kokudlala imidlalo yokuhlunga ne-Orbit College neCasric Stars.

Kugcine kunqobe i-Orbit College kule midlalo yanyukela kwiBetway Premiership.

Imidlalo yeMTN8 akulindekile ithinteke ngoba akukho ushintsho oluzoba khona ekutheni amaqembu aqede kuphi kwilogi yePremieship.

Nokho lokhu akungabazeki ukuthi kuzoyiphazamisa kakhulu iPSL ebese ihlele konke ngokuqala kwemidlalo yesizini entsha.

Imidlalo yeMTN8 kulindeleke ukuthi idlalwe ngempelasonto ezinkundleni ezahlukene.