IChiefs isagoloza ukushaywa nokudedela igoli
SIHLE NGUBO
IKaizer Chiefs iqhubekile nokungashaywa emidlalweni yeBetway Premiership kulandela ukunqoba ngo 1-0 ishaya iRichards Bay FC eFNB Stadium, ngoLwesibili ebusuku.
Amakhosi asayiqale kahle imidlalo yeligi njengoba esenqobe imidlalo emithathu ilandelana, nokuwenza ahlale phezulu kwilogi yePremieship.
Leli qembu laseNaturena liqale lashaya iStellenbosch FC ngo 2-0 emdlalweni wokuqala wesizini.
Ngemuva kwalokho iChiefs ishaye iPolokwane City ngo 1-0 njengoba seyilandelise ngeNatal Rich Boyz.
Kuqale kwabukeka sengathi kuzoba nzima ukuthola igoli kwiChiefs njengoba ziye ekhefini kungu 0-0.
Igoli lize laqhamuka ngomzuzu ka-57 kanti lize noGaston Sirino ongene ngesiwombe sesibili endaweni kaSibongiseni Mthethwa.
Ngemuva kwalokho umdlalo uvulelekile iRichards Bay izama ukuthola igoli lokulinganisa kodwa iChiefs yabambelela.
Ngasohlangothini lweBay bese ishaywa okwesithathu kulandelana nokuyinto okumele ibakhathaze abaqeqeshi baleli qembu.
IBay ivule imidlalo yeligi ngokushaya yiMarumo Gallants ngo 2-1.
Kuphinde kwangahamba kahle nasemdlalweni wesibili ishaywa yiLamontville Golden Arrows ngo 1-0.
Kulo mdlalo wangoLwesithathu uThabo Cele uyena oqokwe njengomdlali ovelele.
Emidlalweni emibili edlule umklomelo womdlali ovele kwiChiefs uwinwe ngu-Aden McCarthy.
Lo mdlali akawuqedanga umdlalo ngoLwesibili njengoba ephume eselimele.
Endaweni yakhe kungene uZitha Kwinika ofike wathatha ibhande likakaputeni ku-Inacio Miguel.
Emdlalweni olandelayo iChiefs izobhekana neMamelodi Sundowns okungumdlalo okulindeleke ukuthi ube nzima kakhulu kuyona.
