Wesese ngokwedlulele ohambise uMbekezeli Mbokazi kwiPirates
SIHLE NGUBO
Ukudlala ibhola elineNkosi phakathi komdlali osemncane we-Orlando Pirates, uMbekezeli Mbokazi, kushiye abalandeli bebhola baseNingizimu Afrika bengawuvali umlomo ngalo mfana.
UMbokazi, oneminyaka engu-19 kuphela nje, ushaye into ecokeme iBafana Bafana ibambana neNigeria ngo 0-0 emdlalweni wokuhlungela iNdebe yoMhlaba, eToyota Stadium, eBloemfontein, ngoLwesibili.
Lo mdlali weZimnyama uqokwe njengomdlali ovelele kulo mdlalo, futhi abaningi abebewubuka bebekulindeleke lokho.
UMbokazi ubedlala kwiDStv Diski Challenge (DDC) ngesizini edlule, ngaphambi kokunyuselwa eqenjini elikhulu maphakathi nayo.
Ngaleso sikhathi iPirates ibizithola ibamba iyeka emuva njengoba bekulimele uThabiso Sesane, uTapelo Xoki no-Olisah Ndah.
Nokho uMbokazi ufike wayibamba kahle emuva noNkosinathi Sisi, washaya nelihle igoli ezakhe zibhekene neSuperSport United emdlalweni weNedbank Cup.
Akumangazi ukuthi lo mdlali, oyibamba ngenxele, useyithemba leBafana Bafana yize esanda kufika esigabeni esiphezulu. Ikhono lakhe yilona elixoxa indaba.
UWonder Mnguni, ongomunye wabaqondisi nabaqeqeshi beLangalibalele Sports Academy, ungomunye wabadlale indima enkulu ekutheni uMbokazi agcine ekwiPirates.
Mayelana nezimanga ezigilwa yilo mfana waseHluhluwe, uMnguni uthe bajabule ngendlela engachazeki.
“Sizizwa sijabule kakhulu uma sibona indlela adlala ngayo uMbekezeli Mbokazi eqenjini lesizwe,” kusho uMnguni.
“Lokho kuyasigqugquzela kakhulu thina njengabaqeqeshi lapha kwiLangalibalele Academy.
“Kugqugquzela nabadlali beLangalibalele, ukubona ukuthi umuntu abebedlala naye namuhla udlala eqenjini lesizwe, futhi unethuba lokuzobekisela indawo kwiNdebe yoMhlaba.
“Ngaphezu kwalokho ube umdlali ovelele emdlalweni omkhulu obudingwa yisizwe sonkana, ukuthi siwunqobe noma sidlale ngokulingana.”
UMnguni uyena obephansi phezulu efunela uMbokazi iqembu, engakaziwa amaqembu amaningi ukuthi unekhono elinje.
Yize egcine kwiPirates kodwa lo mdlali uke wazanyelwa kwiKaizer Chiefs kusekhona uMolefi Ntseki. Nokho abhala acisha Amakhosi wagcina ephelele kweZimnyama.
“Siyakhumbula ukuthi uMbokazi usuke kwiLangalibalele kungu-2023 kuSepthemba njengoba manje kungu-2025 kuSepthemba,” kuqhuba uMnguni.
“Lokhu kuchaza ukuthi sekuhlangene iminyaka emibili engekho lapha, okuyisikhathi esincane kakhulu ukuthi umfana angabe esedlala kahle kangaka, ezingeni elikhulu kangaka.
“Lokho kwenza ukuthi simomotheke lapho sihamba khona. Uma sizwa nje kuthiwa TLB kuba nokumomotheka kithina.
“Sethemba ukuthi uzokwazi ukudlala kwi-Africa Cup of Nations (Afcon) ngoDisemba.
“Ngemuva kwalokho sethemba ukuthi iNingizimu Afrika izozibekisela indawo kwiNdebe yoMhlaba akwazi ukuyodlala kuyona.
“SiyiLangalibalele Academy siyaziqhenya kakhulu ngokuba neso, nokuthi sisize uMbokazi abe lapho ekhona.
“Kuvele kwethuse ukuthi wajima namaqembu afana neRichards Bay FC kodwa abakubonanga thina lokhu esakubona…
“Kwasithatha imizuzu engu-15 kuphela ukubona ukuthi lo mfana wayephezulu kakhulu ukuthi angadlala kithina.
“Siyaziqhenya ngoMbekezeli Mbokazi. Sithi uqhubeke njalo uhloniphe, sizohlale sikweseka njalo.”
UMbokazi nabanye ozakwabo kuzomele bashintshe imiqondo bayibeke kwiMTN8 ngempelasonto.
IBucs izobhekana neStellenbosch FC emdlalweni wamanqamu weMTN8, eMbombela Stadium, ngoMgqibelo ngo-6 ntambama.
