IPirates kuthiwa inqabe u-R26 million eqenjini ebelifuna uMofokeng
SIHLE NGUBO
I-Orlando Pirates kusolakala ukuthi ayifuni ukudedela uRelebohile Mofokeng, yize sekuvele kaningi ukuthi kukhona amaqembu aphesheya amfunayo.
Lo mdlali, oneminyaka engu-20, bekulindeleke ukuthi azitholele amadlelo aluhlaza phesheya kwezilwandle njengoba bekuvulwe iwindi lokuhwebelana ngabadlali.
Nokho kuze kwaba uMohau Nkota, ofike kamuva eqenjini elikhulu, ozithole esayina eqenjini laseSaudi Arabia, wasala uMofokeng.
Ezakamuva zithi iPirates inqabe imali elinganiselwa ku-R26 million ebikhishwa yiqembu laseRussia i-AC Akron Tolyatti ngoMofokeng.
Ngokubika kweDiski Times, leli qembu belisayihlokoloza iPirates ngalesi samba, esibukeka sikahle, kodwa yangayingena indaba yokubamba izingxoxo nalo.
Ngaphambi kwalokhu uMofokeng useke wamataniswa namanye amaqembu obekuthiwa ayamfuna ingakaqali isizini.
Kulawo maqembu kukhona iMaccabi Haifa, iMaccabi Tell Aviv (amaqembu akwa-Israel) neMinneosta United edlala kwiMLS, e-USA.
Okuphawulekayo ngoMofokeng muva nje ukuthi izinga lakhe lithe ukwehla selokhu kuqale isizini.
Bekubukeka sengathi lokho kwenziwa ukufika kwabadlali abasha okukhona kubona u-Oswin Appollis, odlala ngendlela ecisho ifane nekaMofokeng.
Nokho ukuputshuka kwale mibiko kwenza kubukeke sengathi uMofokeng akeneme ngokuphelele kwiBucs.
Elinye iqembu elike lamataniswa nalo mdlali oyiYoung Player of the Season, yi-Al-Ettifaq le okudlala kuyona uNkota.
Nakho lokho kugcine kuphelele emoyeni kwangacaca ukuthi izingxoxo zihambe kanjani.
IPirates izobhekana neStellenbosch FC emdlalweni wamanqamu weMTN8, eMbombela Stadium, ngoMgqibelo ngo-6 ntambama.
