IChiefs izobuyela eKapa ukuyodlala oweCarling Knockout
SIHLE NGUBO
IKaizer Chiefs izovakashela eKapa emdlalweni weCarling Knockout wanonyaka njengoba kuzosuka ushikishi lwale midlalo ngo-Okthoba 4.
Lokhu kuhlaluke kade kuqhathwa amaqembu azodlala kulo mqhudelwano eFNB Stadium, ngoMsombuluko ntambama.
Unozinti weChiefs, uBrandon Petersen uthe lo mdlalo bawubheke ngabomvu njengeqembu.
“Sifuna ukulwela zonke izindebe esizozidlalela kule sizini. Sikubheke ngabomvu ukubuyela eKapa,” kusho uPetersen.
IChiefs seyike yadlala neStellies kule sizini emdlalweni weBetway Premiership, yanqoba ngo 2-0.
Ompetha bale ndebe, iMagesi FC, bazoqala ukuyivikela ngokubhekana naMaZulu FC eThekwini.
IMamelodi Sundowns yona inomdlalo ongelula njengoba izibhekana neMarumo Gallants ePitoli.
I-Orlando Pirates, emangazwe yiMagesi iyikhipha kwiLast 16, izotholana phezulu nomakoti iSiwelele FC.
Esewonke amaqembu azobhekana kwiLast 16 yeCarling Knockout aqhathwe kanje:
AmaZulu FC v Magesi FC; Mamelodi Sundowns v Marumo Gallants; Stellenbosch FC v Kaizer Chiefs; Orbit College v TS Galaxy; Durban City v Polokwane City; Richards Bay FC v Chippa United; Orlando Pirates v Siwelele FC; Lamontville Golden Arrowsv Sekhukhune United.
