ISiwelele isayinise umdlali obegijima kwiPirates
SIHLE NGUBO
ISiwelele FC isaqhubeka nokuqinisa iqembu njengoba kucaca ukuthi insimbi iyashisa kwiBetway Premiership selokhu kuqale isizini entsha.
Leli qembu likuthola kunzima kakhulu ukunqoba imidlalo selokhu lithenge isitifiketi sokudlala seSuperSport United.
Emidlalweni eyisishiyagalombili iSiwelele isanqobe waba munye, yase idlala ngokulingana komunye owodwa.
Lokhu kwenza leli qembu lihlale ngasemsileni welogi yePremiership ngamaphuzu amane.
ISiwelele imemezele ukuthi isayinise umdlali ochithwe yi-Orlando Pirates uZakhele Lepasa.
Lo mgadli ubengalitholi kahle ijezi kwiBucs ngesizini edlule ngakho akumangazanga uma leli qembu limchitha.
ISiwelele bekusaphele izinsuku ezimbalwa ithole uHappy Mashiane noSamkelo Zwane abolekiswe kuyona yiKaizer Chiefs kuze kube sekupheleni kwesizini.
NgoLwesibili iSiwelele idlale kangcono kakhulu yize igcine ishaywe yiPirates ngo 1-0 emdlalweni weBetway Premiership, eToyota Stadium, eBloemfontein.
La maqembu asazophinde atholane phezulu emdlalweni weCarling Knockout osukwini olusazomenyezelwa yiPremier Soccer League (PSL).
Ngesizini edlule iBucs iphume kwiLast 16 kulo mqhudelwano kulandela ukushaywa yiMagesi FC ngo 3-2, obekuyisizini yayo yokuqala kwiPremiership.
Lokhu kufanele kuyigqugquzele iSiwelele ukuthi ingaziphindiselela kwiPirates, iphinde iyimangaze ngokuyiwashisa ijezi kwiCarling Knockout njengoba kwenze iMagesi ngesizini edlule.
IMagesi igcine ingompetha beCarling Knockout kulandela ukushaya iMamelodi Sundowns ngo 2-1 kowamanqamu.
Emdlalweni olandelayo weBetway Premiership iSiwelele izobhekana neMarumo Gallants, eDr Molemela Stadium, eBloemfontein, ngeSonto ngo-3 ntambama.
