Uqweqwe lomqeqeshi lungase luvale isikhala sikaNabi kwiChiefs
SIHLE NGUBO
Ayaqina amahlebezi okuthi iKaizer Chiefs ixoxa nomqeqeshi onamava nohlonishwayo e-Afrika ngamagalelo akhe kunobhutshuzwayo, uPitso “Jingles” Mosimane.
Amakhosi asanda ‘kuhlukana’ nomqeqeshi uNasreddine Nabi okuvele imibiko ehlukene ngokushiya kwakhe eNaturena.
IChiefs ikhiphe isitatimende iqinisekisa ukuthi uNabi akekho eqenjini kodwa yangacacisa ukuthi isizathu sangempela yisiphi.
Kube nemibiko engaqinisekisiwe yokuthi uNabi akanawo amaphepha amvumela ukuthi ahlale ebhentshini ukuthi aqeqeshe emidlalweni yeCAF.
Ukuhamba kukaNabi kwenze iChiefs yathatha isinqumo sokuthi kuzobamba amaphini akhe amabili, uCedric Kaze noKhalil Ben Youseff, kuze kube baxazulula inkinga yomqeqeshi.
Akubukeki ezobuya uNabi eTunisia njengoba sekuvela amahlebezi okuthi abaphathi beChiefs banezingxoxo noMosimane.
Elinye iqembu okukholakala ukuthi ligaqele uMosimane yiWydad Athletic Club yaseMorocco.
UMosimane akanalo iqembu aliqeqeshayo njengamanje kodwa amava akhe awangatshazwa kunobhutshuzwayo.
Lo mqeqeshi useke wacija iSuperSport United, iMamelodi Sundowns neqembu lesizwe iBafana Bafana.
KwiSuperSport, engasekho, unqobe i-SAA Supa 8 ngo-2004 neNedbank Cup ngo-2005.
KwiSundowns ufike washintsha izinto kakhulu enqoba isicoco seligi kahlanu, iNedbank Cup kabili, iTelkom Knockout kabili, iCAF Champions League, neCAF Super Cup.
Ube esenyukela enhla ne-Afrika wayoqeqesha iqembu elihlonishwayo kuleli lizwekazi, i-Al Ahly yase-Egypt.
Kuleli qembu unqobe i-Egyptian Premier League, i-Egypt Cup, iCAF Champions League kabili neCAF Super Cup kabili.
Uke waya eSaudi Arabia lapho ecije khona i-Al Ahli wayisiza yanqoba iSaudi First Division League ngesizini ka-2022/2023.
Uma uMosimane egcina ephelele eNaturena kulindeleke ukuthi afike nethimba lakhe labaqeqeshi, okungasho ukuthi uKaze noBen Youseff babona abeza ngayo, balandele uNabi.
IChiefs izobhekana naMaZulu FC emdlalweni weBetway Premiership, eFNB Stadium, ngoLwesithathu ebusuku.
Ngemuva kwalokho izodlala neStellenbosch FC kwiLast 16 yeCarling Knockout, eDHL Cape Town Stadium, ngeSonto ngo-3 ntambama.
