Umdlali weBucs kulindeleke ajezise iqembu abelidlalela
SIHLE NGUBO
Umdlali we-Orlando Pirates, ovutha engabaselwe selokhu efike kuleli qembu, uKamogelo Sebelebele, uzobhekana neqembu asuka kulona iTS Galaxy emdlalweni weBetway Premiership, e-Orlando Stadium, ngoLwesibili ngo-7.30 ebusuku.
Lo mdlali ungomunye walabo abebenza kahle kwiRockets ngesizini edlule, nokwenze ukuthi iBucs imlande.
Akaphoxanga neze uSebelebele njengoba efike washaya into ecokeme kwiPirates eshaya amagoli abalulekile.
Ushaye igoli kowandulela owamanqamu weMTN8, emlenzeni wokuqala, iPirates ibambana neMamelodi Sundowns.
Uphinde washaya elinye emlenzeni wesibili emdlalweni owaphela ngo 1-1, kwanqoba iPirates sekukhahlelwa amaphenathi.
Sekuyinto eyaziwayo ukuthi iPirates igcine ingompetha beMTN8 ngemuva kokushaya iStellenbosch FC ngo 3-0 kowamanqamu.
USebelebele ushaye intululwane yegoli iPirates inqoba umdlalo wokuqala weBetway Premiership ngokushaya iStellies ngo 1-0 ngo-Agasti.
Leli goli liqokwe njengeliwaqwaqwade wonke amagoli ngo-Agasti futhi kulifanele lokho.
Lo mdlali weBafana Bafana kulindeleke ukuthi aphinde ashaye into ecokeme ngoLwesibili ebhekene neqembu alandwe kulona eZimnyama.
IPirates ishayela phezulu kulandela ukubhaxabula kabuhlungu iLioli yaseLesotho ngo 4-0 emlenzeni wesibili weCAF Champions League ngoMgqibelo.
Leli qembu ligcine lishaywe ngo 7-0 uma kuhlanganiswa namagoli omlenze wokuqala, lapho lathelwa khona othulini ngo 3-0.
Ngasohlangothini lweRockets nakhona kukhona ukuzethemba njengoba igcine ishaye AmaZulu FC ngo 3-1 kowePremiership.
Iqembu elizonqoba kulo mdlalo lizonyukela endaweni yesithathu kwilogi njengoba kuyiwona wodwa umdlalo wePremiership odlalwayo ngoLwesibili ebusuku.
Ngempelasonto kuzodlalwa imidlalo yeCarling Knockout nokuchaza ukuthi izoma kancane imidlalo yeligi.
IPirates izobhekana neSiwelele FC emdlalweni weLast 16 yeCarling Knockout, e-Orlando Stadium, ngoMgqibelo ngo-3 ntambama.
I-TS Galaxy yona izotholana phezulu nomakoti i-Orbit College, e-Olympia Stadium, ngoMgqibelo ngo-3 ntambama.
