I-England ibhubhise amaProteas abesimame ngenduku koweNdebe yoMhlaba

SIHLE NGUBO

INingizimu Afrika iyiqale ngebatha imidlalo yeNdebe yoMhlaba yosuku olulodwa ngemuva kokubhaxabulwa yi-England ngamawikhethi ayishumi, eBarsapara Cricket Stadium, eGuwahati, e-India, ngoLwesihlanu.

AmaProteas aphume wonke esahlanganise ama-run angu-69 kuphela kulo mdlalo. Lesi yisibalo sesibili esincane ukuhlanganiswa yiqembu lakuleli kwiNdebe yoMhlaba.

I-England iwine ithosi yakhetha ukushwiba kulo mdlalo. Ikhiphe amaProteas kuma-over angu-20.4, nobekusho ukuthi ibidinga ama-run angu-70 ukuze inqobe.

Bekubhoke uLinsey Smith obewamise kabi amaProteas, wagcina ethathe amawikhethi amathathu. Lo mshwibi uyena oqokwe njengomdlali ovelele kulo mdlalo.

Abanye abashwibe kahle kwi-England, uNat Sciver-Brunt, ukaputeni, noCharlie Dean, abathathe amawikhethi amabili emunye.

Kubadlali beNingizimu Afrika uSinalo Jafta kuphela ozamile, kanti uphume esenama-run angu-22.

Bonke abanye baphume bengakwazwanga ukufinyelela kuma-run ayishumi.

Iphendula i-England iqale kahle uTammy Beaumont (18*) no-Amy Jones (40*), bangavuma ukuphuma kuma-over okuqala.

Laba bobabili babhethe baze bayoqeda, kwacaca inkinga yokubhetha beyihlasele iNingizimu Afrika kuphela kwi-innings yokuqala.

Ekugcineni i-England iqede konke ngamaProteas kuma-over angu-14.2, yangalahlekelwa nayeyodwa iwikhethi.

Kumele kuwakhathaze amaProteas ukuthi enze kabi ebhetha, aphinde ehluleka ukuthola iwikhethi yokubika kulo mdlalo.

Emdlalweni olandelayo iqembu lakuleli lizobhekana neNew Zealand ngoMsombuluko. Kuzoba umdlalo onzima ngoba nayo iNZ shaywe yi-Australia emdlalweni wokuvula.

Ukaputeni wamaProteas uLaura Wolvaardt, uthe: “Uma usemqhudelwaneni omkhulu kumele umqondo wakho usheshe uwudlulise emdlalweni ofana nalona.”