AmaProteas aphinde ajabula eshaya iBangladesh koweNdebe yoMhlaba
SIHLE NGUBO
INingizimu Afrika iphunyuke sekuvalwe amehlo ishaya iBangladesh ngamawikhethi amathathu, emdlalweni weNdebe yoMhlaba yabesifazane, eDr Rajasekhar Reddy Cricket Stadium, ngoMsombuluko.
Ukunqoba kwamaProteas kuwanyusele endaweni yesithathu kwilogi yamaqembu ayishiyagalombili, nokuwabeka ethubeni elihle lokudlulela kweyandulela owamanqamu.
IBangladesh iyona ewine ithosi yakhetha ukubhetha kuqala kulo mdlalo.
Idlale kahle kakhulu kuma-over ayishumi okuqala njengoba kungekho iwikhethi ewile.
Abadlali abenze kahle uShorna Akter owenze ama-run angu-51 engaphumanga, uSupta ohlanganise angu-50, uJoty (32) noFarzana (30).
Kubashwibi bamaProteas kudlale kahle uNonkululeko Mlaba, othathe amawikhethi amabili, kwathi uNadine de Klerk noChloe Tryone bathatha eyodwa omunye.
IBangladesh ihlanganise ama-run angu-232/6 kuma-over ayo angu-50.
Iphendula iNingizimu Afrika kuqale kwangahamba kahle ilahlekelwa amawikhethi amathathu ngokushesha
Aqhubekile nokuwa amawikhethi amaProteas azithola ena-84/5, kwacaca ukuthi seyinkulu ingcindezi.
UMarizanne Kapp, ophume esehlanganise ama-run angu-56, noTryone, oshaye angu-62, bayibambe kahle, bazama ukubeka iNingizimu Afrika endaweni enhle.
Ngemuva kokuphuma kukaKapp kungene uNadine de Klerk, obe yiqhawe beshaya i-India emdlalweni odlule.
Kuphinde kwenzeka okufanayo kuphuma uTryone, umthwalo wokuwinisa amaProteas wasala kuDe Klerk.
UDe Klerk, obeseyibambe noMasabatha Klaas, ugcine ehlanganise ama-run angu-37 engaphumanga, adlula kanjalo amaProteas.
“Anginawo amazwi amaningi…ngiyajabula ukuthi sigcine siyishayile intambo,” kusho uChloe oqokwe njengomdlali ovelele kulo mdlalo.
AmaProteas azobhekana neSri Lanka emdlalweni wesihlanu weNdebe yoMhlaba ngoLwesihlanu ngo-11.30 ekuseni.
