OweSpurs uvuma ukuthi iChiefs yayifuna ukukhipha u-R4m ngoVelebayi
SIHLE NGUBO
Isikhulu esiphezulu seCape Town Spurs u-Alexi Efstathiou, sesiqinisekisile ukuthi iKaizer Chiefs yayifuna ukuthenga u-Asanele Velebayi kodwa izingxoxo zagcina zibhuntshile.
Ngesizini edlule, i-Urban Warriors isadlala kwiMotsepe Foundation Championship, iChiefs ibimfuna uthuli lo mdlali kodwa u-Efstathiou usechazile ukuthi kungani benqaba ukumdayisela Amakhosi.
“Sasifuna u-R10 million ngo-Asanele (Velebayi) kodwa bathi bazokhipha u-R4 million,” kusho u-Efstathiou kwiMarawa Sports World Wide.
“Bathi bazosiboleka abadlali ababili kodwa senqaba.
“Asenzi ibhizinisi lokuboleka abadlali ngakho base bethula. Yilokho okwenzeka.”
IChiefs neSpurs sebegijimisane enkantolo bebanga uVelebayi noLuke Baartman, abasayine mahhala kuleli qembu laseNaturena besuka kwiSpurs.
Leli qembu laseKapa lidliwe yizembe ngesizini edlule lehlela kwi-ABC Motsepe League, nokuchaza ukuthi uVelebayi noBaartman bese bengazitholela amaqembu abawafunayo, basayine kuwona mahhala.
ISpurs beyifuna ukukhokhelwa ngalaba badlali kodwa icala lagcina liyilahlile okuchaza ukuthi iChiefs ibathole mahhala.
“Kukhona abalandeli beChiefs abahlale bekhononda ngayo yonke into,” kuqhuba u-Efstathiou.
“UKaizer (Motaung) nami savumelana futhi konke kwakukuhle.
“Kodwa ukukhuluma iqiniso ukube ngangiwuKaizer bese kube khona ongitshela ukuthi ‘Lalela ungabathola laba badlali ababili mahhala,’ wawungenzenjani?
“Konke kulele kunembeza kaKaizer uma kungukuthi uyafuna ukuza azokhuluma nathi.”
ISpurs ifuna ukuthola okungenani u-R8 million ngoVelebayi noBaartman, ngoba ikholwa ukuthi bakhulele kuyona ngakho kumele ihlomule ngabo.
IChiefs izobuyela enkundleni ngokubhekana ne-AS Simba yaseCongo, emdlalweni womzuliswano wesibili weCAF Confederation Cup ekuhambeni ngempelasonto.
Umdlalo womlenze wesibili uzokuba seFNB Stadium ngo-Okthoba 24-26.
