Umengameli we-ASA unqunyelwe ugwayi katiki

SIHLE NGUBO

Umengameli we-Athletic South Africa (ASA), uJames Moloi, ubhekene nokuthi amiswe kule nhlangano kulandela izinsolo eziningi abhekene nazo zokungaziphathi kahle.

UMoloi useyalelwe ukuthi aveze izizathu zokuthi kungani kungamele amiswe ngo-Okthoba 31 nonyaka, kulandela uphenyo lweSASCOC.

Ikomiti eliqondisa izigwegwe lizothunyelwa liphenye ukuthi zikhona yini izinyathelo okumele zithathelwe esinye isikhulu, kumbandakanya isikhulu esiphezulu esibambile neFinance Manager.

Uma egcina emisiwe umengameli, iphini lakhe uJohn Mathane uyena ozobamba kuze kube kuthathwa isinqumo ngoMoloi.

I-ASA imemezele inhloso yayo yokumisa uMoloi ngemuva kwesinqumo esithathwe emhlanganweni webhodi, othathe amahora ayishumi ngoMgqibelo (Okthoba 27) e-OR Tambo Garden Court Hotel, eKempton Park, eGoli.

UMoloi unikwe incwadi emyalela ukuthi achaze kungani kungamele amiswe, kodwa uma ehluleka ukwenza lokho uzobe esemiswa.

Umhlangano, oqale ngo-9 ekuseni, bewubanjwe ukuze uveze umbiko weSouth African Sports Confederation and Olympic Committee (SASCOC).

Umbiko ubulandela uphenyo lweSASCOC kulokho okuvezwe yiPortfolio Committee yasephalandende mayelana nokusebenzisa i-credit card ye-ASA kukaMoloi

Ngemuva kokuhlanganisa amakhanda isikhathi eside, ibhodi yemukele izincomo zeSASCOC kulokhu okulandelayo:

1. Ukumiswa kukaJames Moloi ngemuva kokumnika ithuba lokuthi achaze kungani kungafanele amiswe.

2. Ikomiti eliqondisa izigwegwe le-ASA, kumbandakanya isikhulu esiphezulu esibambile neFinance Manager, nabo babhekwe ukuthi iyiphi indima abayidlalile ekusetshenziswe kwale credit card.

Imibiko engaqinisekisiwe ithi phakathi kwezinto abezithenga nge-credit card ye-ASA uMoloi, kukhona izingubo zokugqoka notshwala.