I-Downs izobhekana neBucs engekho umdlali wayo obalulekile
SIHLE NGUBO
Ompetha beligi, iMamelodi Sundowns, bazobhekana nezimbangi i-Orlando Pirates ngaphandle komdlali obalulekile emdlalweni weBetway Premiership, eLoftus Stadium, ePitoli, ngoMgqibelo ngo-3.30 ntambama.
Lo mdlalo iwona omkhulu nobhekwe ngabomvu kule mpelasonto kweyeligi ezodlalwa.
Abafana Ba’Style kuzomele bawudlale ngaphandle komdlali wabo osemqoka uTeboho Mokoena.
Lo mdlali weBafana Bafana unesigwebo samakhadi, okumenza ukuthi aphuthelwe yilo ohlale ushubile phakathi kwalezi zinkunzi.
Omunye umdlali weSundowns ongeke adlale ngenxa yamakhadi uMiguel Silva Reisinho.
Esiswini kungalindeleka ukuthi iSundowns idlalise uBathusi Aubaas endaweni kaMokoena, bese alekelelwe uJaden Adams.
ISundowns nePirates sebeke badlala kabili ekuqaleni kwesizini emidlalweni yeMTN8 ebinemilenze emibili.
Yomibili imidlalo iphele ngo 1-1 kwathi ngemuva komdlalo womlenze wesibili kwashaywa amaphenathi agcine enqotshwe yiPirates.
Kuyona yomibili imidlalo uKamogelo Sebelebele weBucs, ushaye amagoli okulinganisa kade seyihamba phambili iSundowns.
Lokhu kuchaza ukuthi akulula ukuqagula umphumela kula maqembu ngempelasonto, futhi ngeke kumangaze uma lo mdlalo ungaphela lingekho eligobe uphondo.
Ngasohlangothini lwePirates akekho umdlali ovinjwe amakhadi ukuthi adlale, sekungaba yilabo abathintekile.
Ngesikhathi iBucs ibhekene neMagesi FC emdlalweni weCarling Knockout, ngoLwesibili, kukhona abadlali abangawuqalanga umdlalo okukholakala ukuthi ibibaphumuza.
Kulabo badlali kubalwa uSebelebele, uDeon Hotto noSipho Mbule, bonke abangene ngasekupheleni kwesiwombe sesibili.
ISundowns yona ibingadlali phakathi nesonto okuchaza ukuthi bonke abadlali bayo baphumule ngokwanele.
Amathikithi alo mdlalo asedayiswe aphela futhi awekho azodayiswa enkundleni ngosuku komdlalo.
