‘Ngingasinqoba isicoco seligi neChiefs,’ kusho umqeqeshi onamava
INTATHELI YEMPEMPE
Owayengumqeqeshi weMarumo Gallants, uDylan Kerr, ufunga uyagomela ukuthi angayisiza iKaizer Chiefs inqobe isicoco seligi, uma enganikwa ithuba lokuyiqeqesha.
Lo mqeqeshi ulazi kahle ibhola laseNingizimu Afrika njengoba eke wacija iGallants, iBlack Leopards, iTshakhuma neMoroka Swallows, engasekho.
UKerr akasahlali eNingizimu Afrika njengoba eyingxenye yethimba labaqeqeshi elicija iSoccer Stars United yase-USA, ayijoyine ngoJanuwari.
“Uma nginganikwa umsebenzi kwiKaizer Chiefs, ngingabhukuda nginqamule iMediterranean Sea, ngiye emzini kaKaizer Motaung”, kusho uKerr kwiSoccerBeat.
“Ufuna ukunqoba sicoco seligi? Ngingakwenza lokho. Ngihlale ngikusho lokho.”
UKerr ubalule inqwaba yabadlali asesebenze nabo, abenza kahle ebholeni laseNingizimu Afrika, njengesiqinisekiso samava akhe.
Kulabo badlali kukhona uFawaaz Basadien, uSibongiseni Mthethwa, u-Evidence Makgopa, uGeorge Matlou, uKeletso Makgalwa noThabo Khiba, abacije emaqenjini ehlukene njengomqeqeshi.
“Uma ubuka abadlali abadlalela iChiefs, yi-Orlando Pirates neStellenbosch FC, okungamaqembu athathwa njengamakhulu, eminyakeni emithathu edlule ngingathi abaningi basebenzisa abadlali engangisebenza nabo kwiBlack Leopards, iTTM, iMoroka Swallows, neMarumo Gallants,” kuqhuba uKerr.
“Ngakho nakanjani ngingasinqoba isicoco seligi neChiefs. Ngingenza abadlali bangidlalele.
“Uma ubuyela emuva endebeni yomkhulajezi (iNedbank Cup ayinqoba neTTM ngo-2021) ngesikhathi seCovid-19, nganginanabadlali abangu-28, nginamaviki amabili ukubaqeqesha, ngayodlala eThekwini naseGoli kowamanqamu.
“Akusho lutho ukuthi ungubani noma uyini, inqobo nje uma uthola abadlali abazogqoka ijezi bayokulwela enkundleni. Yilokho okubalulekile.”
IChiefs iqeqeshwa ngokubambisana uKhalil Ben Youseff noCedric Kaze, kuze kuphele isizini.
Kubhekwe ukuthi Amakhosi aqashe umqeqeshi omusha ekupheleni kwesizini, ozongena endaweni yalaba ababili.
Amakhosi azobuyela enkundleni ngokubhekana neLamontville Golden Arrows, emdlalweni weBetway Premiership, eFNB Stadium, ngoJanuwari 20.
