URiveiro akayiboni le nkinga yamagoli esolwa kwiBucs

Umqeqeshi we-Orlando Pirates, uJose Riveiro, uyichithile indaba yokuthi iqembu lakhe libhekene nenkinga yokushaya amagoli.

URiveiro usole ukuthi kubukelwa phansi umsebenzi wakhe kule sizini ngokugxila ezintweni ezincane ezingenzeki kahle.

Ukudlala ngokulingana ngo 0-0 neRichards Bay eKing Zwelithini Stadium ngempelasonto kuvimbe iPirates ekunqobeni imidlalo emithathu kulandelana.

Ngaphambi kwlaokhu, beyishlule iSekhukhune neKaizer Chiefs, kwangathi iyabuyela emgqigqweni wokunqoba.

Umdlalo wangoMgqibelo awuzange ukhulise ukuzethemba eqenjini okulindeleke ukuthi liphonsele iMamelodi Sundowns inselelo ngesicoco seligi kule sizini.

Njengamanje iPIrates ihlezi endaweni yesishiyagalolunye ngamaphuzu angu-16 emidlalweni engu-11.

Isele ngamaphuzu ayisishiyagalombili kwiSundowns, engakaze idlale umdlalo weligi kusukela ngasekupheleni kukaSepthemba.

Yize iCape Town City kuyiyo eseqhulwini njengamanje, kodwa lezi zinkunzi zaseTshwane zisenemidlalo eminingi eziyigodlile.

URiveiro ugcizelela ukuthi naphezu kokungayitholi indawo ephezulu nemiphumela iingavumi ngendlela abafisa ngayo, kodwa akaboni kubatshazwani kangaka.

Uthi iqembu lakhe lisesimweni esingcono kakhulu kunalokhu abantu abakucabangayo, kuyikho nje ukuthi imiphumela ibuye ibaphike.

“Inkinga wukuthi nina nihlaziya imiphumela, anifuni ukuhlaziya imidlalo,” kusho lo mqeqeshi odabuka eSpain.

“Sidlala ngokulingana, kuthiwe sinenkinga yokungawashayi amagoli. Sishaya amagoli amathathu, kuthiwe sesingcono.

“Singenelwe amagoli amathathu, kuthiwe ishlulwa ukuvala emuva – niyibuka kalula kanjalo lento.

“Senza izinto ezinhle, ibhola lizishayisa epalini. Ibhola lizishayisa kunozinti engalazi nokuthi lingaphi bese kuthiwa sinenkinga enkulu.

“Indlela esidlale ngayo ibingaphezulu kokuthi siphume nomphumela ka 0-0,” kuchazana yena.

Ngesikhathi iPirates ibhekene nomshikashika wokushaya amagoli, uRiveiro uphendule ngombuzo mayelana namabhola abawakhahlelele ipali.