‘Ngabuyela kuKhoza ngaxolisa,’ kusho owashiya iPirates
SIHLE NGUBO
Ngesikhathi uTeko Modise eshiya i-Orlando Pirates, ejoyina izimbangi iMamelodi Sundowns, abalandeli beZimnyama basala bezwa iminjunju futhi abazange bakufihle lokho.
Le ngwazi yayithandwa kakhulu abalandeli beZimnyama futhi ngaleso sikhathi yayidlala ibhola elinenkosi phakathi.
Kwavela ukuthi uModise akazitholanga izibusiso kusihlalo wePirates, u-Irvin Khoza, nokwakuchaza ukuthi akahambanga kahle eqenjini.
Yize kukhona abalandeli ababefuna kungamhambeli kahle kwiSundowns uModise, kodwa waba nesikhathi esihle eChloorkop waze wanqoba neChampions League.
Ngemuva kweminyaka emihlanu ashiya iPirates kungalindele muntu, lo mdlali owayegijima kwiBafana Bafana, usegonyuluke ngokuthi waya ukuyoxolisa kuKhoza.
“Angicabangi ukuthi ngalithola ithuba lokukhuluma naye, ikakhulukazi ngesikhathi ngisekwiSundowns,” kusho uModise kwiCar Wash 2.0.
“Asilitholanga ithuba lokuxoxa. Ngahlangana naye kanye ngemuva kokunqoba iChampions League, ngoba wayeyingxenye yethimba elasihlangabeza esikhumulweni sezindiza.
“Kodwa into engingakutshela yona, engingacabangi ukuthi sengike ngakhuluma ngayo, ukuthi ngaba nomhlangano naye ngasese, eminyakeni emibili noma emithathu edlule.
“Umhlangano kwakumele uthathe imizuzu engu-30 kodwa wagcina udonsa ihora noma amabili. Kwaba umhlangano obaluleke kunayo yonke kuleyo engake ngayibamba naye.”
UModise akayedwa ukushiya iPirates bese abalandeli basale bekhala bezithulisa.
Kwenzeka okufanayo kushiya u-Oupa “Ace” Mandisa noThembinkosi Porch, bobabili abebeyizithandwa zabalandeli beBucs, bajoyina iDowns.
Ngeledlule kumangale abaningi uMonnapule Saleng obedlalela iPirates ethushuka kwiSundowns.
“Kwaba kuhle emoyeni wami ngoba ngacela ukuhlangana naye,” kuqhuba uModise.
“Manje ngoba sengikhulile angicabangi ukuthi ngashiya iqembu ngendlela eyiyo.
“Ngabuyela emuva ngayoxolisa ngokungakhuli engakukhombisa ngoba kulokho ngangiqhutshwa imizwa.
“Yize ngangifuna ukuhamba kodwa ngangingahamba ngendlela engcono. Kwakuyindlela yokukhula kimina.”
