Obegaqelwe yiDowns neChiefs uqome ukulandela uMbokazi e-USA

SIHLE NGUBO

IChicago Fire, edlala kwiMLS e-USA, ibukeka ibathanda abadlali baseNingizimu Afrika ngemuva kokuthi isilande omunye umdlali weBafana Bafana.

Leli qembu lisanda kusayinisa uMbekezeli Mbokazi obeyibamba emuva kwi-Orlando Pirates, nokuyinto eshiye abalandeli bebhola bephikisana ngezinga leMSL.

Bakhona ababona le ligi yase-USA iphansi kakhulu uma iqhathaniswa namanye amaligi emhlabeni.

Ezakamuva zithi iqembu elisha likaMbokazi seligqeme iMamelodi Sundowns ingozi engeqiwa ntwala, ngokuhlwitha uPuso Dithejane weTS Galaxy.

I-Downs ibizama ukusayinisa uDithejane kanti neKaizer Chiefs ibufuna ukumbuyisa lo mdlali okhulele enkulisa yayo.

Like lavela negama lePirates emaqenjini abefuna uDithejane eze kuwona njengoba kuvulwe window lokuhwebelana ngabadlali.

Ngokwemibiko yakamuva uDithejane, oneminyaka engu-21, usayine inkontileka yeminyaka emine nohhafu neChicago Fire.

Kuleli qembu uzofica uzakwabo kwiBafana Bafana, uMbokazi, olibangise e-USA ngeledlule.

Umqeqeshi weBafana Bafana, uHugo Broos, uzwakalise ukungenami ngokusayina kukaMbokazi kwiChicago Fire, ngaphambi kokuqala kwemidlalo ye-Africa Cup of Nations (AFCON) eseMorocco.

Akungabazeki ukuthi lo mqeqeshi waseBelgium ngeke ajabule ukuthi omunye umdlali weBafana Bafana uzoyibamba kwiMLS, angayizwa kahle indaba yayo.

UDithejane ubenza kahle kakhulu kwiRockets selokhu kuqale isizini ka-2025/2026.

Nokho ukulimala kwenze lo mdlali, ogqame edlalela iChiefs kwiDStv Diski Challenge, waphuthwa yi-AFCON.