U-De Kock ushaye ingcwenga amaProteas ebhubhudla iWest Indies
SIHLE NGUBO
UQuinton de Kock ushaye ama-run angu-115 (49) iNingizimu Afrika ibhubhudla iWest Indies ngamawikhethi ayisikhombisa emdlalweni wesibili weT20, eSuperSport Park, eCenturion, ngoLwesine ebusuku.
Bese kungokwesibili uDe Kock ehlanganisa ama-run angu-100 emidlalweni yeT20 kanti konke ukwenze eSuperSport Park, amaProteas ebhekene neWest Indies.
Owokuqala u-100 uwushaye ngo-2023 kuyona le nkundla iNingizimu Afrika ishaya iWest Indies.
Lo mdlali uphume ngemuva kokuyobamba kahle noRyan Rickelton, ihlanganise ama-run angu-77.
Izivakashi yizona eziwine ithosi zakhetha ukubhetha kuqala kulo mdlalo, obekulindelekile ukuthi ushube.
Kubukeke kuzoba umqansa kumaProteas njengoba iWest Indies ihlanganise ama-run angu-221.
Bekubhoke uHetmyer (75), uRutherford (57) noKing (49), abebengabezwa nhlobo abashwibi bamaProteas.
UKeshav Maharaj uyena ozamile ukunqanda iWest Indies, njengoba ethathe amawikhethi amabili.
Ulekelelwe uMarco Jansen noKagiso Radaba, abathathe iwikhethi eyodwa emunye.
Ngasohlangothini lwezivakashi uHosein uyena owenze kangcono kubashwibi, ethatha amawikhethi amabili.
Ukunqoba kwamaProteas kuchaza ukuthi asekhale emuka nochungechunge lwemidlalo yeT20 emithathu njengoba ewunqobile nomdlalo wokuqala.
Umdlalo wokugcina uzokuba seWanderers Stadium, eGoli, ngoMgqibelo, ngo-6 ntambama.
Ngemuva kwalokho iNingizimu Afrika izolibangisa e-India naseSri Lanka, lapho kuzodlalelwa khona iNdebe yoMhlaba yeT20, eqala ngoFebhuwari 7 isongwe ngoMashi 8.
Indlela elidlala ngayo iqembu lakuleli inika ithemba lokuthi lizokwenza kahle kwiNdebe yoMhlaba yeT20 nonyaka.
