OweLupopo neDowns ungase ucindeze uCardoso kakhulu kwiChamps League
SIHLE NGUBO
Njengoba ingcindezi ithe ne kumqeqeshi weMamelodi Sundowns, uMiguel Cardoso, akungabazeki ukuthi imidlalo yeCAF Champions League kuGroup C ngempelasonto, ingase imcindeze kakhulu kunakuqala.
Lo mqeqeshi wasePortugal angase azithole esenkingeni nabalandeli beSundowns, uma iqembu lakhe lihluleka ukushaya iSaint Eloi Lupopo, emdlalweni weChampions League, eStade TP Mazembe, eDR Congo, ngeSonto ngo-3 ntambama.
Ingcindezi ingase ifakwe kakhulu umdlalo ophakathi kweMC Alger ne-Al Hilal SC, e-Al la Pointe Stadium, e-Algeria, ngoLwesihlanu ngo-9 ebusuku.
I-Al Hilal yaseSudan, izihola phambili ngamaphuzu ayishiyagalombili kuGroup C, kanti iMC Alger yase-Algeria, inamaphuzu amane ngemuva kweDowns enamahlanu.
Ukunqoba kwaleli qembu, elicijwa uRulani Mokwena owayeqeqesha iSundowns, kuzosho ukugudluza Abafana Ba’Style endaweni wesibili, ngaphambi kokuthi babhekane neLupopo enkundleni yayo.
Izindaba ezingezinhle kuCardoso nezakhe, ezithi iLupopo ayikashaywa enkundleni yayo selokhu kuqale imidlalo yamaqoqo yeChampions League.
Leli qembu yilona elikhiphe i-Orlando Pirates kulo mqhudelwano njengoba liyibhuquzise ngo 3-0 enkundleni yalo.
Emdlalweni odlule weChampions League, iSundowns ishaywe yi-Al Hilal ngo 2-1 ekuhambeni, nokwenze izinto zashintsha kwilogi kaGroup C.
Ngakolunye uhlangothi iLupopo iguqiswe yiMC Alger ngo 2-0 ekuhambeni, kodwa ekhaya yalishaya ngo 1-0 leli qembu, yase ibambana ne-Al Hilal ngo 1-1.
Konke lokhu kumele ukuthi uyakwazi uCardoso ngaphambi komdlalo wabo neLupopo, evele ivuke umbhejazane ekhaya.
Ngemuva kokubhuquziswa yi-Al Hilal, uSandile Ndlovu, owake wayibamba kwiSundowns, uthe usenkingeni enkulu lo mqeqeshi wasePortugal.
“UCardoso usenkingeni ngemuva kokushaywa yiqembu elihlale lizabalaza kanzima ngisho ukudlala ngokulingana, elaziwa ngokushaywa,” kusho uNdlovu.
“Lokhu kukhombisa ukuthi uCardoso mkhulu umsebenzi okumele awenze.
“Inkinga ngoCardoso ukuthi ufuna ukudlalisa bonke abadlali baphesheya kulabo abaqala umdlalo, akhohlwe ukuthi kungokokuqala bedlala e-Afrika.
“Kumele akwenze ngesinekelokhu, aqale ngokubafaka ngesiwombe sesibili.”
Ukunganqobi kweSundowns eDR Congo kuzoyicindeza kakhulu uma seyidlala neMC Alger kaMokwena, emdlalweni wokugcina wamaqoqo eNingizimu Afrika.
