AmaProteas abhaxe i-India koweSuper 8 kwiNdebe yoMhlaba yeT20
SIHLE NGUBO
INingizimu Afrika iyiqale kahle imidlalo yeSuper 8 kwiNdebe yoMhlaba yeT20, ngemuva kokushaya osokhaya i-India ngama-run angu-76, eNarendra Modi Stadium, e-Ahmedabad, ngeSonto.
AmaProteas abedinga ukunqoba lo mdlalo ukuze azibeke ethubeni lokudlulela kweyandulela eyamanqamu kwiNdebe yoMhlaba yeT20 ese-India naseSri Lanka.
INingizimu Afrika iyona ewine ithosi yakhetha ukubhetha kuqala kulo mdlalo, obubhekwe ukuthi udle ngokushuba.
Awaqalanga kahle neze amaProteas njengoba kusheshe kwaphuma uQuinton de Kock nokaputeni u-Aiden Markram.
EzikaMarkram zizithole zina-20/3, kwacaca ukuthi amaProteas anengcindezi enkulu.
Kusize ukungena kukaDavid Miller odlale kahle kakhulu ngokubambisana noDewald Brevis, kwabuya ithemba kubafana baseNingizimu Afrika.
UMiller uphume esena-63 kanti uBrevis uhlanganise ama-run angu-45. I-innings ivalwe uTristan Stubbs owenze ama-run angu-44, iNingizimu Afrika yagcina ihlanganise angu-187/7 kuma-over ayo angu-20.
Ngasohlangothini lwe-India kushwibe kahle kakhulu uJaspreet Bumrah othathe amawikhethi abathathu engenelwe ama-run angu-15 kuphela. Ulekelelwe ngu-Arshdeep Singh othathe amabili.
Iphendula i-India nayo iqale kabi kuphuma u-Ishan Kishan ngedada, ekhishwa uMarkram.
Kwi-over yesibili kuphume uTilak Varma (1) ekhishwa uMarco Jansen i-India yazithola ina 5/2.
Ngemuva kokugadla kukaJansen okwesibili kwi-over yesihlanu, ekhipha u-Abhishekh Sharma, i-India izithole inengcindezi kakhulu ina-26/3.
Ukaputeni uYadav Suryakumar ukhishwe uCurbin Bosch ena-18, yathula cwaka inkundla. Ngaleso sikhathi i-India ibina-51/5.
UKeshav Maharaj naye udlale kahle kakhulu kulo mdlalo ethatha amawikhethi amathathu kwi-over eyodwa, yazithola isenkingeni i-India.
Umshwibi wamaProteas oshaye into ecokeme kunabo bonke, uJansen, ogcine ethathe amawikhethi amane, nokwenze i-India waphuma yonke ina-111.
AmaProteas awakashaywa kulo mqhudelwano njengobavm esenqobe imidlalo emihlanu. I-India ibishaywa okokuqala, kanti kuzomele iwunqobe umdlalo ezowudlala neZimbabwe, uma izimisele ngokudlulela phambili.
Bekungokokuqala i-India ishaywa emdlalweni weNdebe yoMhlaba yeT20 ngemuva kwemidlalo engu-12 ilandelana.
Emdlalweni olandelayo weSuper 8 iNingizimu Afrika izobhekana neWest Indies, evuthayo selokhu kuqale iNdebe yoMhlaba yeT20, ngoLwesine enkundleni efanayo.
